Hơnih vei lăng kon pơlei dêh char Quảng Ngãi hlôi hop akom ăn tơgop nơ̆r găh tơdrong tơ iung pơjing hnam trương teh đak rong ‘me jăl ƀar pêng tơ̆ rim tơring sơlam teh đak. Hloh đơ̆ng dăr lăng, Hơnih vei lăng Hnam trương pơtho pơhrăm dêh char Quảng Ngãi pơchoh trong ăn Hơnih vei lăng kon pơlei dêh char tơchơ̆t rơih 4 tơring ‘noh Dục Nông, Mô Rai, Sa Loong, Rờ Kơi vă tơmơ̆t jên jang ming man 4 hnam trương hŏk. Dôm tơring ou jĭ tơring tơnap tap hloh, trong nơnăm mơmat tat, kon pơlei oei sa răh rap, găh lơ ‘noh bơngai Xơ Đăng, Bahnar, Giẻ Triêng. Dêh char gô ming man ‘nao 2 hnam trương păng ming hơmet pơ ‘lơ̆ng 2 hnam trương. Akŏp kon jên tơmơ̆t jang 600 ti hlak jên. Sơnăm 2025 dêh char proh ăn dang 117 ti hlak jên đơ̆ng kon jên jang vă tơ iung pơjing ming man. Ƀok Nguyễn Hoàng Giang, Kơdră chĕp pơgơ̆r Hơnih vei lăng kon pơlei dêh char Quảng Ngãi athei rim hơnih bơ̆ jang đei ƀơm truh iung jang hloi dôm tơdrong đei pơjao, kơrŭn đĭ ai iung jang ming man rim hnam trương lơ̆m năr 15/11 kơnh, ming man keh đang lơ̆m khei 7/2026.