VOV.Bahnar - Lơ̆m “khei hơ druh tơ dăm”, Đoan hơ druh tơ dăm Kŏng ti jang ŭnh điên Dak Lak pơ gơ̆r lơ tơ drong jang ‘lơ̆ng hơ iă. Mă hơ dăh ‘noh, anih jang hlôi asong tơ mam ăn kơ 6 ‘nu hŏk tro dơ nuh hin yak hloh mơ mat tat tơ̆ xăh Bình Hòa, apŭng Krông Ana, 1 tơ pu tơ mam đei kơ jă 2 triệu hlak jên; tơ lĕch jang tơ drong jang “ Tơ̆k hơ dăh trong pơ lei” tơ̆ thôn Giang Xuân, xăh Ea Dah, apŭng Krông Năng, kơ jung 1km trong tơ ley hăm 19 tŏ kơ ƀŏng ŭnh kơ đeng tơ̆k hơ dăh tơ pôl, akŏp kơ jă hloh 30 triệu hlak jên.

Đoan hơ druh tơ dăm PC Dak Lak asong tơ mam ăn kơ đe hŏk tro dơ nuh hin yak hloh mơ mat tat

Kŭm lơ̆m khei hơ druh tơ dăm, anih jang hlôi bơ̆ jang tơ drong jang “ Tơ̆k hơ dăh trong pơ lei” đei kơ jă 50 triệu hlak jên, iŏk pơm hloh 1km trong tơ ley hăm 22 tŏ kơ ƀŏng ŭnh kơ đeng tơ̆k hơ dăh dôm trong găh plei Sút M’drang, xăh Cư Suê, apŭng Cư M’Gar. Kŭm hăm dôm tơ drong jang vei lăng sơ đơ̆ng tơ drong arih sa tơ pôl, hơ druh tơ dăm PC Dak Lak hơ nơ̆ng bơ̆ jang tơ drong hơ len lăng ki thuơ̆t trong trung, hạ áp, anih biến áp lơ̆m tơ ring sơ lam apŭng Ea Súp.

Thuem: Tơ blơ̆