Ƀât tŏk bŏk bri kông găh Hơlĕch Trường Sơn, plei Đak Asel, xăh Sơn Lang, dêh char Gia Lai sơ̆ jĭ tơring kăn kư̆ kăch mang nuih mơng kơ kon pơlei Bahnar lơ̆m dôm sơnăm rơblăh vang. Lơ̆m rông pơlei hrei ‘nâu, rup Ƀok Hô đei hơtol ƀât anih ‘lơ̆ng rŏ hlŏh. Tơ̆ hơla ‘nŏh jĭ kơthơ Ƀok gơih ăn Hop akŏm dôm Hơdrĕch kon kông tơring Pơbăh sơnăm 1946. Chĕp kơthơ tơ̆ ti, kră pơlei Đinh Hmunh pơma dơ̆ng nơ̆r pơtho ăn đe ‘lơ ‘lơp lơ̆m pơlei: “Kon pơlei Yoăn dăh mă Thổ, Mường dăh mă Mán, Jarai dăh mă Rađe, Xơ Đăng dăh mă Bahnar păng dôm hơdrĕch kon kông nai, tơtă kon sâu Việt Nam ngăl, tơtă ‘nhŏng oh ngăl”; "Đak krong gơ̆h hrơ̆, kông gơ̆h hơleh, mă lei tơdrong mât mĭnh ƀơ̆r đon đơ̆ng bơ̆n ưh đei lai yơ hiong".

Kră pơlei Đinh Hmunh ăn tơbăt, chĕp răk nơ̆r Ƀok Hô pơtho, tơdrong mât mĭnh ƀơ̆r đon truh dang ei đei kon pơlei Đak Asel vei kơjăp kiơ̆ đơ̆ng pơtho tơƀôh ăn kon sâu hŏk pơhrăm, bơ̆ jang păng chĕp vei tơdrong juăt ‘lơ̆ng lơ̆m pơlei: “Kon pơlei tôch ‘mêm Ƀok Hô. Inh pơtho ăn kon sâu athei hŏk pơhrăm mă ‘lơ̆ng, băt mơ̆ng păng jang kiơ̆ nơ̆r Ƀok Hô pơtho.”

Jur tơ̆ găh Pơbăh Tây Nguyên, tơ̆ plei Pa, xăh Cư Prao, dêh char Đắk Lắk, kon pơlei Rađe dôm năr ‘nâu oei hơnơ̆ng ƀlŏk kơ dơ̆r kơ Ƀok Hô. Lơ̆m dôm sơnăm tơblăh vang sơ̆, đon lui kiơ̆ Đảng, kiơ̆ Ƀok Hô tơgŭm ăn kon pơlei tơ̆ âu mât 1 ƀơ̆r đon vang vei lăng pơlei pơla.

Ƀok Y Tuân Ksơr, Bí thư Chi ƀô̆ plei Pa ăn tơbăt, đơ̆ng rŏng kơ tơblăh iŏk rơngei, jơhngâm đon ‘nĕh hơnơ̆ng đei chĕp vei kơjăp kŭm hăm băl jang tŏk mŭk drăm, rong ‘me kon hơ ‘lơ̆p hŏk pơhrăm: “Kon pơlei ‘mêm bơnê kơ Ƀok Hô dêh, tơtă ăn băl athei mât 1 ƀơ̆r  đon, adrin choh jang xa, pơm kiơ̆ ‘lơ̆ng trong jang đơ̆ng Đảng, khôi luơ̆t teh đak. Gơnơm đơ̆ng Đảng, teh pơngơ̆t ăn, pơlei pơla hlôi đei unh điên, trong man, hnam trưng, hnam pơgang kơjăp ‘lơ̆ng, tơdrong arih xa roi đunh roi tŏk.”

Tơ̆ tơring găh Pơbăh Tây Nguyên, kon pơlei M’Nông tơ̆ xăh Quảng Trực, dêh char Lâm Đồng kŭm ‘măn ăn Ƀok Hô ƀĕnh jơhngâm đon ‘mêm kơ eng. Kră pơlei Điểu Đi, plei Bu Prăng 2, xăh Quảng Trực ăn tơbăt, lơ̆m dôm sơnăm tơblăh tôch krưp krĕnh sơ̆, kon pơlei tơ̆ âu mât 1 ƀơ̆r đon, rong ôn kăn ƀô̆, vei lăng kăch mang.

Hrei ‘nâu, ƀât đei lơ tơdrong tơplih tơ̆ tơring kăn kư kăch mang sơ̆, jơhngâm đon ‘mêm kơ Ƀok Hô oei đei hơnơ̆ng lơ̆m jơhngâm đon kon pơlei, păng hơnơ̆ng pơtho tơƀôh ăn kon sâu đơ̆ng rŏng dơ̆ng: “Kiơ̆ Đảng, kiơ̆ Ƀok Hô, sơ̆ kon pơlei vang iung tơblăh vei lăng teh, vei lăng pơlei pơla. Hrei ‘nâu rơngei hiôk bơih ‘nŏh akŏm jơhngâm jang xa, pơjing pơlei pơla. Tơdrong arih xa tơplih ‘nao ‘lơ̆ng hơiă dêh.”

Hăm yă Linh Nga Niê K’đăm, kon drŏ kăn ƀak si Y Ngông Niê K’đăm, sơ̆ Pơm Kơdră Anih vei lăng hơdrĕch kon kông kơ Quốc hội, tơdrong ƀlŏk truh Ƀok Hô ưh kơsĭ đei hăm dôm tơdrong tih kiơ ôh mă ‘nŏh jĭ jơhngâm đon iâm dim, jĭ dôm tơdrong jang tôch ‘lơ̆ng mă đơ̆ng iơ iĕ ră. Lơ̆m khei ‘năr hŏk tơ̆ Hnam trưng kăn ƀô̆ kon kông tơ̆ tơring groi kông Trung ương găh Tơring Kơtu, yă lơ ‘măng đei tơƀâp Ƀok Hô.

Yă Linh Nga oei ƀlŏk hơnơ̆ng rup Ƀok tŏk ngôi tơ̆ hnam ký túc xá hăm hŏk tro kon kông, tơtă ăn đe duch vei rong athei pih hơmet khăn, kơmŭng ăn đe kon mon vă huei kơ tơƀoch; jur tơ̆ hnam gŏ ‘nŏh tơtă ăn đe duch pai por gŏ lê̆ pai por khôi, kơnh đe kon mon sŏng xa ưh kơmăh: “Ƀok apinh đe sâu sŏng xa hăm phĭ ưh, hăm pơtâp hơkâu jăn ưh. Ƀok tơtă athei sŏng xa mă phĭ vă hŏk rơgei, pơtâp hơkâu jăn vă pran, đơ̆ng rŏng âu vih pơm kăn ƀô̆ mă ‘lơ̆ng ăn Tây Nguyên.”

Đơ̆ng dôm tơdrong ‘mêm kơ eng ‘nŏh, đon tơchĕng mât 1 ƀơ̆r đon đơ̆ng Ƀok Hô jing tơdrong tôch kăp gĭt, tơguăt kơjăp đĭ đăng hơdrĕch hơdrung Tây Nguyên, jing jơhngâm pran vă Tây Nguyên yak hlŏh pơmat tat đơ̆ng rŏng kơ pơjing đei 1 teh đak kơjăp ‘lơ̆ng.

Kiơ̆ ƀok Ksor Phước, sơ̆ pơm Kơdră Anih vei lăng hơdrĕch kon kông kơ Khul kơdră  teh đak, đơ̆ng rŏng kơ sơnăm 1975, lơ pơlei pơla Tây Nguyên oei arih xa ƀât âu, kơdâu oei tơ̆ to, arih xa tôch pơmat tat. Mă lei gơnơm mât 1 ƀơ̆r đon, kŭm hăm dôm trong jang, tơdrong tơgŭm đơ̆ng Đảng, teh đak, um ai Tây Nguyên hlôi đei tơplih ‘nao ‘lơ̆ng: “Kon pơlei Jarai, Bahnar, đơ̆ng 1 tơpôl kơhlôh, kơvao hlôi jang đei đơ̆ng 8-10 tân ƀa 1ha, tôch hơiă. Kon pơlei kon kông bơ̆n, 1 kơsô̆ unh hnam hlôi đei gre ô tô bơih. Tơdrong jơnei đơ̆ng Đảng păng Teh đak jĭ ‘nŏh bơih lah.”

Lơ̆m dôm ‘măng năm ngôi păng bơ̆ jang tơ̆ Tây Nguyên, Tổng Bí thư, Kơdră teh đak Tô Lâm pơma hơdăh, athei iŏk kon pơlei pơm tơm, vei lăng năng tông tơdrong arih xa kơ kon pơlei, atŏk tơiung kơjă kăp gĭt đơ̆ng joh ayŏ kơ dŏ xoang vă pơjing jơhngâm pran atok tơiung păng hơmet kơjăp mĭnh ƀơ̆r đon, tơguăt kơjăp đĭ đăng kon pơlei:

“Rim tơdrong vă jang tŏk, rim tơdrong tơmât jên jang athei hơlen năng rim tơdrong vă pơm hơtŏk tơdrong arih xa găh tơmam drăm, jơhngâm đon, tơdrong sơđơ̆ng hiôk chơt kơ kon pơlei, mă loi jĭ hăm kon pơlei kon kông, tơring hơtăih yăih. Atŏk tơiung mŭk drăm tơklep kơjăp hăm vei lăng cham char, vei lăng bri, vei lăng đak, vei lăng anih oei xa đunh đai kơ tơpôl. Kŭm hăm ‘nŏh, athei năng kăl tơdrong chĕp vei, tưk tơiung tơdrong joh ayŏ kơ dŏ xoang Tây Nguyên păng tơdrong joh ayŏ kơ tơring đak dơsĭ tôch kăp gĭt, jĭ jơhngâm pran tơm vă jang tŏk, vang tơgop gĭt kăl ăn tơdrong jang tŏk mŭk drăm tơpôl păng hơmet kơjăp tơdrong pơvei, mât mĭnh ƀơ̆r đon kơ đĭ đăng kon pơlei.”

Khei 5 vih tơ̆ tơring bri kông. Lơ̆m dôm tŏ rông, lơ̆m jơva chĭng chêng păr ang lơ̆m pơlei pơla, nơ̆r Ƀok Hô pơtho găh tơdrong mât mĭnh ƀơ̆r đon oei hơnơ̆ng đei đe kră pơlei pơtho ăn kôn mon kon sâu. Păng kŭm đơ̆ng tơdrong tơguăt 1 ƀơ̆r đon ‘nŏh, Tây Nguyên hrei ‘nâu oei tơplih rim năr, roi phĭ tơtŏ dơnŏ ‘lơ̆ng, roi sơđơ̆ng ‘lơ̆ng rŏ, roi pơdrŏng hơnŭk hơnoa kiơ̆ đơ̆ng tơguăt đĭ đăng hơdrĕch hơdrung Việt Nam./.