VOV4.Bahnar - Khei druh dăm 2022 đei hơ năn “Sơ năm mơ lôh rơ gei”. Kŭm hăm lơ̆m tĕh đak, druh dăm tơ̆ dôm tơ ring tơ̆ Tây Nguyên tŏk bŏk đei lơ tơ drong jang tôch đei yoa, hue lăng truh tơ̆ tơ ring tơ rang.

“Khie druh dăm” sơ năm ‘nâu đei Anih jang đoan dêh char Dak Lak pơ gơ̆r năm bơ̆ jang tơ̆ xăh Drai Bhăng, apŭng Cư Kuin. Tơ̆ jơ pơm lêh, Anih jang đoan dêh char Dak Lak hlôi pơ ma nuh găh tơ drong jang chô̆ unh điên tơ̆k hơ dăh trong pơ lei tơ̆ xăh Ea Tiêu păng tơ drong jang “Kơ mĭl tơ ƀôh 3 tơ drong ‘lơ̆ng” tơ̆ Hnam trưng THPT Y Jut. Tơ lĕch 150 triu hlak jên vă chă tơ drong jang ăn druh dăm tơ̆ apŭng Cư Kuin. Pơ jao 1 pôm hnam ăn bơ ngai tơ nuh păng hơ păh 40 tơ pu tơ mam (1 tơ pu 300 rơ bâu hlak jên), 20 tong gre tang vang ăn dôm unh hnam mơ mat tat păng hŏk tro adrin hŏk pơ hrăm. Anih jang đoan apŭng Cư Kuin kŭm pơ jao 1 pơm hnam ăn unh hnam tơ nuh, 1 anih pơm ngôi ăn hơ iŏh păng pơ gơ̆r man 1 pôm sân păh ƀŏng lŏng.

Anih jang Đoàn dêh char Dak Lak tơ lĕch lơ tơ drong jang druh dăm

Mŏ H’Giang Niê, Bí thư đoan dêh char Dak Lak ăn tơ băt, hăm tơ drong tơm pơ jing jơ hngâm pơ jei băl, hơ iă hăm dôm tơ drong chinh trĭ tih lơ̆m sơ năm, ƀât mă oei ƀơm ưh ‘lơ̆ng đơ̆ng jĭ hơ buh, sơ năm mơ lôh Dak Lak tơ lĕch lơ tơ drong jang tôch hơ dăh lăng kiơ̆ tơ drong ‘mĕh vă tơ̆ tơ ring, pơ gơ̆r jang ‘lơ̆ng vă jang kĕh dôm tơ drong hơ găt đei tơ lĕch vă pơm ‘lơ̆ng ăn tơ drong tang găn jĭ:

“Hơ năn khei druh dăm sơ năm ‘nâu ‘nŏh “Sơ năm mơ lôh rơ gei”, hăm lơ tơ drong, lơ̆m nŏh đei tơ drong pơ chĕh lơ̆m trong pơ gơ̆r jang, mă loi jĭ jang kiơ̆ ‘lơ̆ng tơ drong tang găn jĭ păng pơ gơ̆r kĕh hop akŏm đoan jăl jang 2022 – 2027. Hăm dôm anih jang đoan athei tơ guăt 1 ƀơ̆r đon, 1 jơ hngâm vă tơ gŭm ăn anih jang đoan kŭm nhen đoàn viên druh dăm lơ̆m dêh char păng adrin hlŏh dơ̆ng lơ̆m tơ drong jang kiơ̆ 11 tơ drong hơ găt kơ khei druh dăm păng dôm tơ drong hơ găt lơ̆m sơ năm 2022”.

Lơ̆m “Khei Druh dăm”, sơ năm mơ lôh dêh char Dak Lak adrin jang kĕh tơ drong chô̆ unh điên tơ̆ 5km Trong pơ lei; khăm, ƀơk pơ gang ăn 2.000 ‘nu bơ ngai; pơ gơ̆r tŏ sĕt hlŏh ‘nŏh 10 anih hŏk hôp, ngôi pơ chơt ăn hơ iŏh tơ̆ xăh mơ mat tat; man 5 tŏ hnam ăn bơ ngai đei kŏng, hnam ăn bơ ngai mơ mat tat, hơ iŏh mơ mat tat. Hơ nơ̆ng yak hơ doi hăm druh dăm iung jang xa, krao hơ vơn pơ jing đơ̆ng 1-2 HTX, grup jang hơ doi kơ druh dăm; tơ gŭm ăn dôm tơ drong iung jang xa đơ̆ng druh dăm lơ̆m dêh char.

Tơ̆ thĭ trơ̆n Plây Kần, apŭng sơ lam Ngọc Hồi, Anih jang đoan dêh char Kon Tum kŭm pơ gơ̆r Lêh tơ lĕch Khei druh dăm păng tơ drong jang “Khei 3 tơ rong sơ lam - Tơ ring sơ lam tĕh đak bơ̆n”. Kơ tă ƀât jơ pơm lêh, Anih jang đoan Kon Tum hơ păh 20 tơ pu tơ mam ăn unh hnam kăn ƀô̆, linh oei bơ̆ jang tơ̆ tơ ring sơ lam păng đe druh dăm đei tơ drong arih xa mơ mat tat; pơ jao the Đoàn viên păng grat Đoàn ăn 50 'nu đoàn viên 'nao; roi tơ băt 20 'nu đoàn viên rơ gei ăn anih jang đảng vă set hơ len, pơ tho pơ hrăm tơ mât lơ̆m đảng…

Ƀlep ƀât ‘măng mă âu, Khul druh dăm păng Khul drŏ kăn Anih tơm vei lăng Công an hơ păh 10 trong jang tŏk mŭk drăm đei 1.000 tŏ iĕr yŏng chĕh kơ tăp ăn 10 unh hnam đei kŏng, unh hnam mơ mat tat dêh hlŏh, ƀok pơ tho lui khop tơ̆ tơ ring kon kông. Hơ păh 3 tŏ kơ măy vi tinh, 200 tơ mam (đei hla ar, ‘long chih) păng man đak tơ nglang “Đak rơ gŏh ăn ŏh” tơ̆ hnam trưng jăl 1 xăh Pờ Y, apŭng Ngọc Hồi, dêh char Kon Tum. Pơ jao 6 tŏ kơ măy vi tinh, 200 tơ pu tơ mam (đei hla ar, ‘long chih) ăn 2 hnam hŏk tơ̆ plei Phu Cưa păng hơ păh 16 tŏ kơ măy tinh ăn 8 anih Công an găh dêh char Attapư, tĕh đak Lào.

Pơ jao the Đoàn viên păng Grat Đoàn ăn đe đoàn viên ‘nao tơ̆ Kon Tum

Tơ̆ Gia Lai, “Khei druh dăm” sơ năm ‘nâu đei Anih jang đoan dêh char Gia Lai pơ gơ̆r tơ̆ xăh Ia Trôk, apŭng Ia Pa. Tơ̆ jơ pơm lêh, Anih jang đoan dêh char Gia Lai hơ păh 135 tơ pu tơ mam ăn đe ŏh hŏk tro; Hơ păh 1 “Anih đŏk hla ar, pơ ma nuh păng bơ̆ jang lơ̆m Khul” đei kơ jă 50 triu hlak jên; hơ păh kơ ƀang chih tơ băt ăn 2 tŏ hnam “Khăn kuang ƀrê” ăn 2 ‘nu hơ iŏh đei tơ drong arih xa mơ mat tat. ‘Ngoăih kơ ‘nŏh, anih oei pơ gơ̆r lơ tơ drong jang yoa tơ pôl nhen: Plang song hlŏh 400 tơ pu pham, tơ gŭm năr jang, pơm hơ met trong pơ lei, man hnam ăn bơ ngai đei kŏng. 

‘Nhŏng Đỗ Duy Nam, Phŏ Bí thư đoan dêh char Gia Lai ăn tơ băt, dôm tơ drong jang lơ̆m Khei druh dăm sơ năm 2022 đei tơ lĕch tôch ‘lơ̆ng đơ̆ng tơ ring, tơ ƀôh hơ dăh đon adrin đơ̆ng druh dăm sơ năm mơ lôh, jang kĕh 'lơ̆ng rim tơ drong đei tơ lĕch: “Khul kơ dră chĕp kơ̆l Đoan dêh char đei lơ trong jang, tơ drong jang , chă pơ tho tơ ƀôh ăn tơ ring lăng kiơ̆ tơ drong jang vă pơ truh tôm bơ ngai jang, kơ chăng lơ̆m tơ drong athei kăn ƀô̆, đoan viên vang jur jang. Pơm thoi yơ vă tơ drong jang ‘nŏh gơ̆h jang kĕh trŏ khei ‘năr hơ găt hai, kơ jăp ‘lơ̆ng, đei yoa hai, mă loi jĭ dôm tơ drong jang roi tơ băt hơ iă kơ Khei druh dăm păng kăl hlŏh jĭ hơ iă kơ Hop akŏm Đoàn jơ̆p tơ ring”.

Hăm hơ năn “Sơ năm mơ lôh rơ gei”, “Khei druh dăm” sơ năm ‘nâu đei Trung ương Đoàn TNCS Hồ Chí Minh pơ gơ̆r tơ lĕch tơ̆ Anih tơm Hà Nội. Tơ̆ âu oei pơ gơ̆r tơ drong pơ dă tơ ƀôh “Đon rơ gei đơ̆ng druh dăm, sơ năm mơ lôh”; tơ lĕch man 1,2 anih nhen Hnam khăn kuang ƀrê păng hơ păh tơ mam ăn hŏk tro đei tơ drong arih xa mơ mat tat; roi tơ băt 16 Khul grŭp Tơ plih ‘nao rơ gei… Kŭm lơ̆m khei druh dăm sơ năm ‘nâu mơ̆n, Trung ương Đoàn TNCS Hồ Chí Minh vă pơ gơ̆r Pơ ma nuh đơ̆ng Bí thư mă mônh Trung ương Đoàn hăm đe đoàn viên, druh dăm; tơ drong jang “Khei 3 tơ ring sơ lam”; hơ păh tơ mam ăn 10 ‘nu druh dăm sơ năm mơ lôh Việt Nam rơ gei sơ năm 2021 păng tơ drong jang tơ băt 91 sơ năm Năr pơ jing Đoàn TNCS Hồ Chí Minh, hơ păh tơ mam Lý Tự Trọng sơ năm 2022.

Dơ̆ng: Tơ blơ̆