VOV4.Bahnar - Kơsơ̆ năr 12/1, Khŭl bơ̆ jang Dơnŏ anĭh jang Dăr lăng Tĕh đak kơ yuơ ƀok Trần Sỹ Thanh, Kơdră jang lơ̆m Dơnŏ anĭh chep pơgơ̆r Trung ương Đảng, Kơdră chĕp pơgơ̆r Dơnŏ anĭh bơ̆ jang Dăr lăng jên hu tĕh đak pơm kơdră khŭl hlôi bơ̆ jang hăm dêh char Dak Lăk găh tơdrong jang kiơ̆ rim nơ̆r pơkăp hơlen kơ tơring.

Tơbăt ăn khŭl bơ̆ jang, Kơdră chĕp pơgơ̆r Đảng dêh char Dak Lăk Nguyễn Đình Trung hlôi tơbăt mĭnh ƀar tơdrong jang jơnei kơ dêh char lơ̆m khei năr au ki, lơ̆m au, rim hơnĭh bơ̆ jang, tơring hlôi jang kiơ̆ kơ jăp nơ̆r pơrô̆ jang đơ̆ng Trung ương Đảng, Khŭl kơdră tĕh đak, Thủ tướng Tĕh đak, jang kiơ̆ “ƀar tơdrong jang hrơ̆p mĭnh ‘măng” mĭnh păh akŏm atŏk kơtang jang sa, pơm tơlĕch, tĕch mơdro, sơđơ̆ng erĭh sa tơpôl adoi tơlĕch jang kiơ̆ kơtang, jơnei tang găn jĭ hơbuh Covid-19. Iung pơma tơ̆ jơ bơ̆ jang, ƀok Trần Sỹ Thanh hôn bơnê dôm tơdrong jơnei mă dêh char Dak Lăk iŏk đei lơ̆m sơnăm au ki, mă kăl ‘nŏh lơ̆m rim tơdrong jang hơvơn tơmơ̆t jên jang păng tơgŭm djru hơnĭh mơdro sa. Mă kăl, Dak Lăk kăl akŏm xek tơlang keh đang rim tơdrong oei tim mă ‘lơ̆ng hơ iă đei tơƀô̆h tơbăt lơ̆m Hla bơar chĭh tơbăt Tơdrong jang Dăr lăng hơlen kon jên hu bơ̆ jang tơring đơ̆ng sơnăm 2016 năm tơ̆ rŏng sơ̆ mă Dơnŏ anĭh jang Dăr lăng jên hu tĕh đak hlôi đei nơ̆r pơma trŭh.

Tơblơ̆ nơ̆r: Amazưt