VOV4.Bahnar - ‘Năr brei 04/3, Khŭl bơ̆ jang kơ Jơ nŭm vei lăng hơ drĕch kon kông ƀok Y Thanh Hà Niê Kđăm - bơ ngai jang lơ̆m Khŭl chĕp kơ̆l pơ gơ̆r Trung ương Đảng - bơ ngai jang lơ̆m Anih chĕp kơ̆l pơ gơ̆r Kuôk hô̆i, Kơ dră Jơ nŭm vei lăng hơ drĕch kon kông pơm kơ dră khŭl hlôi đei jơ bơ̆ jang hăm Anih vei lăng kon pơ lei dêh char Sóc Trăng vă hơ len lăng tơ drong đei ƀơm ƀơ̆t jang kiơ̆ tơ chơ̆t đơ̆ng Thủ tướng teh đak păng tơ chơ̆t đơ̆ng Anih vei lăng hơ drĕch kon kông găh dôm trong jang tơ gŭm đei ƀơm truh tơ ring kon pơ lei kon kông tơ̆ dêh char Sóc Trăng. Kiơ̆ tơ roi tơ băt đơ̆ng Anih vei lăng kon pơ lei dêh char Sóc Trăng, tơ drong jang kiơ̆ 02 tơ drong tơ chơ̆t âu tŏk bŏk lơ̆m jăl jang blŭng kơ na Anih vei lăng kon pơ lei dêh char hlôi pơm rim tơ drong hiôk ăn rim tơ ring lơ̆m tơ drong băt hơ dăh bơ ngai lơ̆m tơ lĕch jang kiơ̆ trong jang tơ gŭm kon kông jăl jang ‘nao. Pơ ma tơ̆ jơ bơ̆ jang, Kơ dră Jơ nŭm vei lăng hơ drĕch kon kông Y Thanh Hà Niê Kđăm tơ băt kiơ̆ đơ̆ng nơ̆r tơ gop tơ lĕch đơ̆ng dêh char Sóc Trăng, khŭl gô chih răk, apĭnh nơ̆r tơ gop đơ̆ng rim Anih tơm, anih jang ƀơm truh đơ̆ng noh đei dôm nơ̆r apĭnh truh Khŭl kơ dră teh đak vă tơ gŭm rim tơ ring jang kiơ̆ ‘lơ̆ng dôm trong jang tơ gŭm 1 trong hiôk păng đei yua hloh.

Thuem: Tơ blơ̆