VOV4.Bahnar -  Pơ gê ‘năr 12/7, tơ̆ Anih jang kơ Khŭl kơ dră teh đak, Thủ tướng Phạm Minh Chính pơ gơ̆r jơ bơ̆ jang đơ̆ng Khŭl kơ dră chĕp kơ̆l teh đak hăm kơ dră chĕp kơ̆l Đảng grŭp anih jang mơ dro sa Trung ương găh chĕp kơ̆l pơ gơ̆r tơ drong jang hơ met ming dơ̆ng, hơ tŏk ‘lơ̆ng iŏk yua tơ drong jang đơ̆ng anih jang mơ dro sa teh đak.

Pơ ma tơ̆ jơ bơ̆ jang, Thủ tướng Phạm Minh Chính tơ băt ‘nâu jĭ ‘măng vă pơ ma dơ nuh dơ̆ng tơ drong pơ gơ̆r bơ̆ jang kiơ̆ tơ drong tơ chơ̆t hop akŏm ‘măng mă XIII kơ Đảng hăm Kơ dră chĕp kơ̆l Đảng grŭp anih jang mơ dro sa Trung ương, mă loi ‘noh jĭ hơ len lăng, lăng dơ̆ng dôm jơ nei bơ̆ jang đơ̆ng rim grŭp jang mŭk drăm, akŏng ti tơm teh đak tih; pơ ma dơ nuh, hơ met pơ ‘lơ̆ng dôm tơ drong tơ hlăk hlĭn, ưh kơ ‘lơ̆ng. Tơ̆ hơ năp kơnh Thủ tướng athei, Khŭl kơ dră chĕp kơ̆l Đảng grŭp tơ plih hơ mơt jing hiôk, hơ tŏk ‘lơ̆ng hơ năp jang, hơ drin hloh dơ̆ng, bơ̆ jang kơ tang hloh dơ̆ng, đei tơ drong tơm. Hơ nơ̆ng tơ chĕng hơ len jang đang khŭl jang pơ gơ̆r lơ̆m anih jang mơ dro sa teh đak ‘nao, đei yua, tŏ sĕt bơ ngai, tơ chĕng hơ drol trong jang tơ gŭm, vei lăng kang ƀô̆ pơ̆n tơ chĕng pơ̆n jang.

Thuem: Tơ blơ̆