Pơgê 10/12, Khul dăr hơlen kơ Anih vei lăng hơdrĕch kon kông yoa ƀok Võ Văn Bảy – Kơdră Anih dăr hơlen kơ Anih vei lăng Hơdrĕch kon kông chĕp kơ̆l đei jơ bơ̆ jang hăm Anih vei lăng kon pơlei dêh char Đắk Lắk vă pơdrơ̆ng nơ̆r ăn tơdrong Dăr hơlen găh bơ̆ jang Tơdrong jang tơm kơ teh đak atŏk tơiung mŭk drăm, tơpôl tơ̆ tơring kon kông păng groi kông đơ̆ng 2021 - 2030, jăl I: 2021 - 2025 (krao kơđeh ‘nŏh Tơdrong jang 1719) tơ̆ dêh char Đắk Lắk.

Kiơ̆ tơdrong dăr hơlen, tơdrong jang 1719 tơ̆ Đắk Lắk đei tơlĕch jang ‘lơ̆ng, iŏk đei lơ tơdrong jơnei vă tơgŭm ăn kon pơlei kon kông, hơmet pơ ‘lơ̆ng anih jang, trong nơnăm păng hơtŏk tơdrong arih xa ăn kon pơlei. Mơ̆ng, chih iŏk nơ̆r tơgop đơ̆ng Khul dăr hơlen đơ̆ng Anih vei lăng hơdrĕch kon kông, yă H’Yim Kđoh, Phŏ Kơdră Anih vei lăng kon pơlei dêh char Đắk Lắk bơnê khul hlôi roi tơƀôh dôm tơdrong mă dêh char jang tam mă ‘lơ̆ng, păng trong hơmet ming tơ̆ hơnăp kơnh. Atŭm hăm ‘nŏh, Phŏ Kơdră vei lăng kon pơlei dêh char Đắk Lắk pơma hơdăh, tơ̆ hơnăp kơnh vă bơ̆ jang mă pran hlŏh mơ̆ tơlĕch jang tơdrong jang 1719 tơ̆ tơring.