VOV4.Bahnar - Kơsơ̆ năr 9/2, Kơdră chĕp pơgơ̆r Tĕh đak Nguyễn Xuân Phúc ‘nao kĭ Tơchơ̆t pôk ăn Mê đai jang pran kơtang ăn Khŭl drŏ kăn đă ƀŏng lŏng Tĕh đak, Bơngai chĕp pơgơ̆r khŭl păng rim bơngai đă ƀŏng lŏng kơ Khŭl Đă ƀŏng lŏng hlôi iŏk đei jơnei gĭt kăl ba khŭl drŏ kăn đak ƀŏng lŏng ‘măng blŭng vang Pơlong đă pơtôch Tơmam hơpăh Pran kơtang đă ƀlŏng lŏng apŭng plĕnh tĕh kơ drŏ kăn (World Cup) 2023 kơ Jơnŭm khŭl đă ƀŏng lŏng Apŭng plĕnh tĕh. Hơdrol kơ ‘nŏh, lăp đơ̆ng rŏng khŭl drŏ kăn đă ƀŏng lŏng tĕh đak iŏk đei jơnei tơ̆ hơnăp khŭl drŏ kăn đă ƀŏng lŏng Thái Lan ƀơ̆t năr 2 Têt Nhâm Dần păng Jơnei Đài Bắc Trung Hoa năr 6 Têt au ki, Kơdră chĕp pơgơ̆r Tĕh đak Nguyễn Xuân Phúc jei pơtrŭh nơ̆r hmach bơnê kơ rim bơngai đă păng Bơngai pơtho Mai Đức Chung. Atŭm lơ̆m năr, Kơdră chĕp pơgơ̆r Tĕh đak hlôi athei Kơdră chĕp pơgơ̆r Dơnŏ anĭh tơm vei lăng Jŏh ayŏ kơdŏ soang, Đă ƀŏng lŏng tơplŏng kơdau păng tơmang pơ hiơ̆ atŭm hăm Dơ̆ anĭh chep pơgơ̆r Pơlong-Pôk hơpăh Trung ương iung jang tĕnh koăng pơm hla bơar, ƀlep tơchơ̆t vă tơtom pôk hơpăh 2 ‘nu pơtho, atŭm hăm rim bơngai đă ƀŏng lŏng khŭl drŏ nglo păng drŏ kăn hlôi iŏk đei jơnei hơ iă.

Tơblơ̆ nơ̆r: Amazưt