Rup Jơ hop akŏm

Jơ̆p lơ̆m tĕh đak đei vă jê̆ 9 triu ‘nu đô̆i viên, hlŏh 7 triu ‘nu hơ iŏh oei hŏk pơ hrăm, pơ tâp tơ̆ vă jê̆ 25.000 khul grŭp tơ̆ dôm hnam trưng tĕh đak pơ jing păng hnam trưng đơ̆ng kon pơ lei pơ jing. Khei ‘năr âu ki, tơ drong vei lăng, năng tông, pơ tho pơ hrăm ăn hơ iŏh đơ̆ng rim anih jang đoan, Khul tơ lĕch jang đei yoa ‘lơ̆ng. Lăp jô̆ đơ̆ng sơ năm 2018 truh dang ei, Đoàn man ‘nao đei hlŏh 12.400 anih hŏk hôp, ngôi pơ chơt păng tơ gŭm ăn hlŏh 3 triu 800 ‘nu hơ iŏh đei tơ drong arih xa mơ mat tat, akŏm đĭ đăng đei kơ jă hlŏh 2.600 ti hlak jên. Kŭm hăm ‘nŏh tơ lĕch jang lơ trong jang hơ iă, gơ̆h hơ gei, lăp ‘lơ̆ng truh hăm lơ hơ iŏh đô̆i viên, hơ iŏh iĕ. 

Khul hơ iŏk dêh char Lâm Đồng pơ gơ̆r tơ drong ngôi pơ chơt ăn đe hơ iŏh tơ̆ tơ ring

Hop akŏm hlôi pơ ma nuh, tơ gop lơ nơ̆r ăn hla chih tơ roi; ƀai chih tơ blang găh tơ lĕch jang ‘lơ̆ng tơ drong jang kơ đe hơ iŏh Việt Nam pơ jei băl pơm kiơ̆ 5 tơ drong Ƀok Hô pơ tho; tơ iung tơ drong pơ chĕh rơ gei mưh bơ̆ jang roi tơ băt trong vei lăng, năng tông, pơ tho tơ ƀôh ăn hơ iŏh; hơ năp jang đơ̆ng Khul lơ̆m tơ drong tơ gŭm man anih hŏk hôp, ngôi pơ chơt ăn hơ iŏh; bơ̆ jang tơ gŭm mă ‘lơ̆ng ăn hơ iŏh đei tơ drong arih xa mơ mat tat; păng hơ tŏk tơ drong đei yoa đơ̆ng tang găn tơ drong glơ̆k tơ̆ đak hăm đe hơ iŏh...