VOV4.Bahnar - Kơ sơ̆ 3/4, khul jang đơ̆ng Anih tơm vei lăng choh jang xa păng atŏk tơ iung tơ ring tơ rang truh dăr lăng tơ drong hơ met pơ ‘lơ̆ng hiong răm yoa đơ̆ng ‘mi tih tơ̆ dêh char Quảng Bình. Lơ̆m 3 năr âu ki, dêh char Quảng Bình đei ‘mi tih tơ̆ lơ tơ ring. ‘Nâu jĭ ‘măng ‘mi tih kơ nê̆ pơm hiong răm lơ ăn tơ drong choh jang xa, mă loi jĭ pơ yan jang ƀa Phang.

‘Mi tih pơm ăn đak lơ̆p hlŏh 5.900ha ƀa, lơ̆m nŏh apŭng Lệ Thủy vă jê̆ 3.700ha, apŭng Quảng Ninh hlŏh 1.000 ha. Quảng Bình đei hlŏh 910ha ka rong lơ̆m chŭn na, lơ̆ sơ lŭng rong ƀrăng păng dôm jĭt hơ drao rong ka hiong răm. Mă đơ̆ng ‘mi da ƀiơ̆ bơih ră mă lei oei đei lơ chŭn na ƀa, hơ ƀo răm kơ đak lơ̆p jrŭ tơ̆ dôm tơ ring thŭng lơ̆m apŭng Quảng Ninh, Lệ Thuỷ.

Dêh char Quảng Bình athei Anih tơm vei lăng choh jang xa păng atŏk tơ iung tơ ring tơ rang tơ gŭm hơ drĕch ‘long pơ tăm, kon yŏng vă jang xa dơ̆ng. Tơ̆ hơ năp ning mônh kơnh, dêh char athei Trung ương tơ gŭm jên bơ̆ hơ met bơ nơ̆ găn đak păng đing tơ̆ bơ nơ̆ găn đak tơ̆ dôm anih kăl đĭ hư bơih; tơ gŭm jên hơ met ming dôm anih krê hư pơ chăh vă kon pơ lei sơ đơ̆ng jơ hngâm arih xa, tơ iung ming dơ̆ng tơ drong choh jang xa.

Dơ̆ng: Tơ blơ̆