Adrol kơ ‘nŏh, đơ̆ng nơ̆r roi tơbăt kơ kon pơlei tơ̆ tơring, 'năr 5/10, kăn ƀô̆, linh Khul K51 pơgơ̆r năm hơlen năng tơ̆ plei Tusvai, xăh Đắk Đam, dêh char Mondulkiri. Vă gơ̆h năm truh tơ̆ anih sir chă, khul jang athei yak jơ̆ng hoh hlŏh 2 jơ, tŏk trong kông, tơhrông thong đak.

Đơ̆ng rŏng kơ sir jrŭ hlŏh 60 cm, đe linh chă ƀôh lơ tơmam đei ƀơm truh linh lôch tang ăn teh đak. 2 kơting linh đei ƀŭ hơtăih băl dang 2 met, hơtăih kơ thong đak hlŏh 50 met păng jê̆ 1 tơm 'long tih. Đơ̆ng rŏng kơ băt hơdăh anih, khul pơgơ̆r sir chă, kôch iŏk chơ vih, 'măn răk, vei lăng păng soi kơkuh tơ̆ Anih soi kơ linh lôch tang ăn teh đak. Thoi noh, đơ̆ng rŏng 20 năr năm bơ̆ jang pơyan phang 2026-2027 tơ̆ Campuchia, Khul K51 hlôi sir chă, kôch iŏk đei 3 kơ̆l linh lôch tang ăn teh đak. Vang tơgop 'lơ̆ng ăn tơdrong jang 500 măng năr, chơ ba đe linh lôch tang ăn teh đak vih dơ̆ng tơ̆ pơlei pơla.