‘Năr 1/11, đơ̆ng nơ̆r kon pơlei tơroi, Khul K51, Anih chĕp kơ̆l pơgơ̆r khul linh dêh char Đắk Lắk jang hơdoi hăm khul linh păng khul kơdră tơring tơ̆ Campuchia sir chă, kôch iŏk đei 2 kơ̆l linh lôch tang ăn teh đak tơ̆ tơring jê̆ thong đak Ô Tôi păng thong đak Đắk Đam, dêh char Mondulkiri.

Lơ̆m noh, tơ̆ thong đak Ô Tôi, khul sir chă, chă ƀôh 1 kơ̆l linh lôch tang ăn teh đak kŭm hăm lơ tơmam đơ̆ng ƀô đô̆i Việt Nam. Tơ̆ anih jê̆ thong đak Đắk Đam, khul sir chă, kôch iŏk đei 1 kơ̆l linh lôch tang ăn teh đak kŭm hăm lơ tơmam nhen ƀlak ao linh, kơchai pơgang penicillin, ‘long chih păng tơpang chơkhŏ. Kơting 2 kơ̆l linh lôch tang ăn teh đak đei chih vih tơ̆ anih ‘măn răk, vei lăng păng soi plang.

Đơ̆ng rŏng vă jê̆ 2 khei bơ̆ jang lơ̆m pơyan phang 2026-2027 tơ̆ Campuchia, Khul K51 hlôi chă ƀôh, kôch iŏk đei 10 kơ̆l linh lôch tang ăn teh đak. Mă đơ̆ng oei đei lơ tơdrong pơmat tat găh tơring teh thŭng thong, tŏ ‘mi kial ưh ‘lơ̆ng păng nơ̆r roi tơbăt ưh rơđăh, kăn ƀô̆, linh lơ̆m khul oei hơnơ̆ng adrin tơchă, vang tơgop chơ ba kơting linh lôch tang ăn teh đak, bơngai juăt jang păng linh năm tơblăh tơgŭm đơ̆ng Việt Nam lôch tang tơ̆ Campuchia vih dơ̆ng tơ̆ teh đak kơdih.