Trong jang proh hơmet anih kơdrơ̆m Buôn Ma Thuột truh sơnăm 2050 đei teh să dang 37.738 hek tar, đei dôm pơđĭ teh bơ̆jang kơ 5 phường: Buôn Ma Thuột, Tân An, Tân Lập, Thành Nhất, Ea Kao păng xăh Hòa Phú. Tơdrong hơgăt tơlĕch ăn ‘noh jĭ pơjing Buôn Ma Thuột jing anih kơdrơ̆m akŏm, joăt jang kơ tơring păng kơ dêh char; hơnih tơm tơƀưh đơ̆ng Tây Nguyên hăm tơ ter đak dơsĭ Nam Trung Bộ. Anih kơdrơ̆m hơtŏk tơiung kiơ̆ trong rơgoh, hiôk, hơgei, ‘nao, lơ tơdrong ‘lơ̆ng hơiă păng pơm lăp hăm tơplih tŏ ‘mi kial.

Mĭnh lơ̆m dôm tơdrong kăl kơ lăng truh đơ̆ng trong jang proh hơmet ‘noh jĭ pơjing dơ̆ng anih kơdrơ̆m jing 6 hơnih, 9 hơnih kơdrơ̆m, 2 tơdrong jang tơm păng 2 tơdrong jang hơtŏk tơiung. Lơ̆m noh, phường Buôn Ma Thuột jĭ anih kơdrơ̆m tơm, hăm hơnih kơdrơ̆m hmă păng hơnih jang akŏm lơ tơdrong jang ‘nao tơ̆ hơnih dơnâu đak Ea Tam. Dôm hơnih uơ oei dơ̆ng đei vă jang hăm dôm tơdrong jang hơdrô̆. Phường Tân An hơtŏk tơiung tĕch mơdro, pơvih pơvăn, pơtho pơhrăm păng kon pơlei oei sa ‘nao ‘lơ̆ng; phường Tân Lập jĭ anih kơdrơ̆m ‘lơ̆ng păh Hơlĕch. Phường Ea Kao iŏk dơnâu đak Ea Kao pơm hơnih tơm hơtŏk tơiung tơmang lăng cham char bri brăh, tĕch mơdro, pơvih pơvăn, kơmăy kơmŏk păng pơtho pơhrăm. Phường Thành Nhất iŏk hơnăp jang tơgŭm rĭ kon pơlei ăn hơnih kơdrơ̆m đei dang ei. Xăh Hòa Phú đei vă jang hơtŏk tơiung kơmăy kơmŏk rơgoh, logistics tơmam đơ̆ng choh jang sa đei.

Tơdrong roi tơbăt Trong jang proh hơmet atŭm anih kơdrơ̆m Buôn Ma Thuột truh sơnăm 2050 jĭ tơdrong ‘lơ̆ng gĭt kăl vă Đắk Lắk păng dôm tơring jang kiơ̆ ‘lơ̆ng trong jang hơtŏk tơiung, pơgơ̆r hơnih kơdrơ̆m păng hơvơn jên tơmơ̆t jang. Ƀok Đỗ Hữu Huy, Kơdră Anih vei lăng kon pơlei dêh char Đắk Lắk pơma hơdăh, trong jang proh hơmet atŭm anih kơdrơ̆m Buôn Ma Thuột truh sơnăm 2050 ưh khan lăp pơjing trĕng lăng hơtŏk tơiung ‘nao ăn anih kơdrơ̆m tơm Tây Nguyên mă oei pơih să hơnih jang hơdai đơ̆ng groi kông hăm tơ ter đak dơsĭ Nam Trung Bộ.

“Dêh char băt hơdăh roi tơbăt trong jang proh hơmet athei tơklep hăm tơdrong pơgơ̆r bơ̆jang kiơ̆ đei iŏk yua, hơvơn jên jang, tơlĕch jang dôm tơdrong jang tơm păng vei sơđơ̆ng hơtŏk tơiung tơdrong hơtŏ, kơjăp. Jơnei đơ̆ng trong jang proh hơmet ưh khan lăp pơmơ̆ng lơ̆m trĕng lăng hơtŏk tơiung mă oei pơmơ̆ng lơ̆m tơdrong kĕ pơgơ̆r. Rim trong jang athei đei jang kiơ̆ ‘lơ̆ng hăm tơdrong bơ̆jang, rim nơ̆r pơkăp athei đei jang kiơ̆ ‘lơ̆ng hăm iŏk yua, rim tơdrong hiôk hơtŏk tơiung athei đei tơplih jing tơdrong ‘lơ̆ng jang tŏk ‘nao”.

Trong jang proh hơmet atŭm anih kơdrơ̆m Buôn Ma Thuột truh sơnăm 2050 pơih ăn trĕng lăng păng hơtŏk tơiung ‘nao ăn anih kơdrơ̆m tơm Tây Nguyên. Vă bơ̆jang kiơ̆ ‘lơ̆ng trĕng lăng âu, tơdrong gĭt kăl ‘noh jĭ khŏm jang lơ̆m pơgơ̆r bơ̆jang kiơ̆, hơvơn jên jang păng tơlĕch jang hrơ̆ch dôm tơdrong jang, ƀrư̆ ƀrư̆ pơjing Buôn Ma Thuột jing anih kơdrơ̆m rơgoh, ‘nao, đei lơ tơdrong ‘lơ̆ng, tơ găl hăm anih kơdrơ̆m jang hơdai tơring.