‘Năr 17/01, tơ̆ Anih bơ̆jang kơ Trung ương Đảng, Khŭl kơdră chĕp kơ̆l  Trung ương Đảng jăl XIII hlôi hop akŏm set hơlen găh tơdrong apĭnh pơdơh kơjang păng pơdơh hưu đơ̆ng ƀok Nguyễn Xuân Phúc, Kơdră teh đak Cộng hoà xã hội chủ nghĩa Việt Nam, Kơdră Jơnŭm vei lăng sơđơ̆ng teh đak jăl jang 2021 – 2026. Kiơ̆ lơ̆m kơchư̆k jang Thủ tướng teh đak jăl jang 2016 - 2021, ƀok hlôi đei lơ tơdrong hơdrin lơ̆m chĕp kơ̆l, pơgơ̆r, vei lăng tơdrong jang tang găn jĭ Covid-19 iŏk đei jơnei gĭt kăl.

Mă lei, ƀok pŭ hơnăp jang chĭnh trĭ đơ̆ng bơngai chĕp kơ̆l ƀơ̆t lê̆ lơ kang ƀô̆, lơ̆m noh đei 2 ‘nu Phŏ Thủ tướng, 3 kơdră tơm đei pơm glăi, ưh kơ ‘lơ̆ng, pơm ăn hiong răm tôch kơ tang; 2 Phŏ Thủ tướng hlôi apĭnh pơdơh kơ pơm dôm kơchư̆k jang, 2 kơdră tơm păng lơ kang ƀô̆ đei sek phak. Ƀôh hơdăh hơnăp jang tơ̆ hơnăp Đảng păng Kon pơlei, ƀok hlôi đei hla ar apĭnh pơdơh kơ jang pơm dôm kơchư̆k đei klăih song, pơdơh kơ jang păng pơdơh hưu. Khŭl kơdră chĕp kơ̆l pơgơ̆r Trung ương Đảng drơ̆ng ăn lê̆ ƀok Nguyễn Xuân Phúc pơdơh kơ jang dôm kơchư̆k, pơjao kơ Anih tơm Chĭnh trĭ pơgơ̆r dôm anih jang ƀơm truh tơlĕch jang kiơ̆ dôm hla ar kiơ̆ tơdrong hơgăt.