VOV4.Bahnar - “Hrôih đei trong jang hơmet pơ ‘lơ̆ng tơdrong tĕch mơdro tĕh măt ư̆h kơ lăp, vă veh ver pơm kơnê̆ trŭh đunh đai tai sơnăm ăn tơdrong atŏk tơ iung mŭk drăm tơpôl”. ‘Nau jing nơ̆r athei đơ̆ng khŭl Kơdră tang măt Kuô̆k hô̆i dêh char Dak Lăk tơ̆ jơ bơ̆ jang hăm Dơnŏ anĭh vei lăng Mŭk drăm bri brăh păng Cham char găh trong jang kiơ̆ trong bơ̆ jang, khôi luơ̆t găh jang kiơ̆ pơkom, tang găn brăh brư, jăl jang 2016-2021 lơ̆m năr 13/4.

Kiơ̆ đơ̆ng Dơnŏ anĭh vei lăng Mŭk drăm bri brăh păng Cham char dêh char Dak Lăk, chĭh jô̆ 3 khei blŭng sơnăm 2022, tơdrong tĕch răt tĕh lơ̆m dêh char đei trŭh 103.000 ‘măng, tŏk vă jê̆ 200% pơtêng hăm khei au sơnăm sơ̆. Kơ jă tĕh jei tŏk măt pơtêng hăm jăl 4 sơnăm 2021. Tơ̆ hơnăp tơdrong au, Dơnŏ anĭh vei lăng Mŭk drăm bri brăh păng Cham char hlôi chĭh pơtrŭh hla bơar tơbăt ăn Dơnŏ anĭh vei lăng kon pơlei dêh char pơrô̆ athei rim apŭng dăr lăng kơ jăp tơdrong tơplĭh iŏk yua tĕh. Khŭl Kơdră tang măt Kuô̆k hô̆i athei, Dơnŏ anĭh vei lăng Mŭk drăm bri brăh păng Cham char dêh char Dak Lăk atŏk kơtang pơrô̆ pơrôp, pơtho tơbăt khôi luơ̆t vă jang kiơ̆ pơkom, tang găn brăh brư đei jơnei. Adoi lăng kơ jăp vei lăng kon jên jang tĕh đak, khŭl jang, mŭk drăm ƀlep tơdrong tơchơ̆t; sơđơ̆ng iŏk yua trŏ ƀlep groi tĕh, thoong đak kơ jăp ‘lơ̆ng.

Tơblơ̆ nơ̆r: Amazưt