VOV4.Bahnar - Lơ̆m 2 năr, 20 păng 21/9, Khul tang măt Kuô̆k hô̆i dêh char Dak Nông pơ gơ̆r lơ ‘măng tơ ƀâp bơ ngai tăh hla tơ̆ dôm xăh Nâm N’Jang (apŭng Đak Song), xăh Quảng Tâm (apŭng Tuy Đức), xăh Quảng Phú (apŭng Krông Nô) păng xăh Quảng Sơn (apŭng Đak Glong) adrol kơ Hop akŏm mă 4, Kuô̆k hô̆i jăl XV.

Khul tang măt Kuô̆k hô̆i dêh char Dak Nông tơ ƀâp bơ ngai tăh hla

Tơ̆ dôm ‘măng tơ ƀâp, dôm bơ ngai tang măt Kuô̆k hô̆i tơ̆ Dak Nông roi tơ băt tơ drong vă pơ ma nuh lơ̆m Hop akŏm mă 4 Kuô̆k hô̆i jăl XV vă pơ gơ̆r lơ̆m khei 10 truh, vă hơ len năng lơ tơ drong kăl, khôi luơ̆t, lơ̆m nŏh đei lơ luơ̆t ƀơm truh tơ drong arih xa kơ kon pơ lei. ‘Nŏh jĭ dôm kơ luơ̆t Kon pơ lei pơm tơm tơ̆ tơ ring, Luơ̆t tĕh oei chih hơ met, Luơ̆t vei lăng bơ ngai răt yoa tơ mam, Luơ̆t Hơp tak xăh.

Bơ ngai tăh hla Dak Nông đei lơ nơ̆r pơ ma apĭnh hăm Bơ ngai tang măt Kuô̆k hô̆i

Bơ ngai tăh hla Dak Nông đei lơ nơ̆r pơ ma truh dôm tơ drong oei tơ tŏ tơ̆ tơ ring, mă lơ ‘nŏh jĭ dôm tơ drong oei tơ hlăk ƀơm truh tơ̆ tĕh, vei lăng bri, pơm hla ar hiơ̆ hyĭn tơ̆ tơ ring. Mă loi lơ̆m tơ drong choh jang xa, bơ ngai tăh hla athei tơ lĕch trong tơ gŭm ăn kon pơ lei jang chŭn mir, tŏk klăih đơ̆ng tơ drong “Jang đei, kơ jă reh”, “kŏh - pơ tăm, pơ tăm - kŏh”.

Dơ̆ng: Tơ blơ̆