VOV4.Bahnar - Pơ gê 29/3, tơ̆ dêh char Quảng Ninh, Khul tơ blang hơ len Trung ương pơ gơ̆r hop akŏm ‘măng mă 3. Hop akŏm vă pơ ma nuh, tơ gop nơ̆r ăn 2 Hla ar chih roi tơ ƀôh, ‘nŏh jĭ Hla chih roi tơ ƀôh “Mĭnh ƀar tơ drong vă tơ blang hơ len – tơ̆ yăn âu lơ̆m hlŏh 15 sơ năm bơ̆ jang kiơ̆ tơ drong tơ chơ̆t Trung ương 7 jăl X găh choh jang xa, kon pơ lei jang chŭn mir, tơ ring tơ rang”, Hla ar chih roi tơ ƀôh “Mĭnh ƀar tơ drong vă tơ blang hơ len – tơ pă tơ̆ yăn âu lơ̆m hlŏh 20 sơ năm bơ̆ jang kiơ̆ tơ drong tơ chơ̆t Trung ương 5 jăl IX găh hơ nơ̆ng tơ plih ‘nao, atŏk tơ iung păng pơm hơ tŏk tơ drong đei yoa đơ̆ng mŭk drăm atŭm”. 

Jơ bơ̆ jang lơ̆m hop akŏm

Pơ ma lơ̆m hop akŏm, Kơ dră vei lăng Khul tơ blang hơ len kơ Trung ương Nguyễn Xuân Thắng pơ ma hơ dăh: Dôm tơ drong jơ nei hlôi iŏk đei tôch gĭt kăl. Đơ̆ng rŏng 35 sơ năm tơ plih ‘nao, choh jang xa đei hơ yak tŏk pran, jing pơm tơ lĕch lơ tơ mam drăm, tơ mât yoa kơ măy kơ mŏk, jang đei tơ mam ‘lơ̆ng, roi đei yoa, hơ nơ̆ng jing jrăng tơ jră ăn anih jang mŭk drăm; mŭk drăm tơ ring tơ rang oei jang tŏk hơ nơ̆ng; tơ drong jang pơ jing tơ ring tơ rang ‘nao iŏk đei lơ jơ nei gĭt kăl.

Dơ̆ng: Tơ blơ̆