VOV4.Bahnar - Anih pơ gơ̆r jang kơ tĕh đak găh tang găn sar bar ‘nao đei hla ar chih gơih ăn Anih pơ gơ̆r tang găn sar bar păng chă dŏng bơ ngai răm kơ dêh char Kon Tum; dôm Anih tơm vei lăng choh jang xa păng atŏk tơ iung tơ ring tơ rang, jang kơ măy, tĕch mơ dro; Grŭp jang unh điên Việt Nam; Anih jang Vật lý Plei tĕh găh tơ drong kơ chăng tơ jră hăm tĕh dơ drŏ tơ̆ dêh char Kon Tum. Kiơ̆ nơ̆r tơ roi găh tĕh dơ drŏ đơ̆ng Anih jang Vật lý plei tĕh, Anih tơ chĕng hơ len Khoa học Việt Nam, ‘năr 23/8 đei 4 ‘măng tĕh dơ drŏ tơ̆ apŭng Kon Plông, dêh char Kon Tum, lơ̆m nŏh đei ‘măng tĕh dơ drŏ jăng truh 4,7 đô̆ rích re, tôch krê hơ mơt. 

Vă kơ chăng tang găn, tơ jur ƀiơ̆ tơ drong hiong răm đơ̆ng tĕh dơ drŏ, Anih pơ gơ̆r jang kơ tĕh đak găh tang găn sar bar athei Anih pơ gơ̆r jang tang găn sar bar păng chă dŏng bơ ngai răm dêh char Kon Tum, dôm Anih tơm, anih jang kơ pal đei ƀơm truh hơ len năng tơ drong răm, tơ drong ƀơm ưh ‘lơ̆ng đơ̆ng tĕh dơ drŏ hăm hnam kon pơ lei, anih jang, hnam hŏk păng dôm anih jang, trong nơ năm, tơ tom chă ƀôh, hơ met pơ ‘lơ̆ng anih hư vă vei sơ đơ̆ng ăn kon bơ ngai păng tơ mam drăm; hơ met khul jang, tơ mam, gre, kơ măy kơ mŏk vă tơ jră păng hơ met pơ ‘lơ̆ng hiong răm mưh đei.

Dơ̆ng: Tơ blơ̆