VOV4.Bahnar - Tơ̆ Anih bơ̆ jang kơ khŭl dră teh đak, Phŏ Thủ tướng Vũ Đức Đam pơ gơ̆r jơ hop akŏm trực tuyến lơ̆m teh đak găh tơ drong pơih ‘măng hnam trưng hŏk rim tơ ring. Pơ tôch tơ̆ jơ hop akŏm, Phŏ Thủ tướng pơ ma hơ dăh: Tơ drong năm hŏk đơ̆ng hơ ioh ‘noh tôch kơ gĭt kăl, ưh khan lăp hơ drô̆ ƀơ̆t đei jĭ đĕch mă pơ đĭ hloi ƀơ̆t ưh kơ đei jĭ. Hơ ioh oei tơ̆ hnam đunh gô hơ nhăk truh tơ drong ưh kơ ê; ưh khan lăp găh gơh chư, hlôh vao, mă ƀơm ưh kơ ‘lơ̆ng đunh truh tơ drong tih vơ̆ djơ̆ ‘lơ̆ng đơ̆ng hơ ioh. Băt hơ dăh tang găn jĭ hơ buh Covid-19 ‘noh đunh đai, Phŏ Thủ tướng Vũ Đức Đam tơ ƀlŏk dơ̆ng tơ drong athei tơ iung ming dơ̆ng dôm tơ drong jang hơ trŏk tơ iung mŭk drăm - tơ pôl lơ̆m tơ drong arih sa sơ đơ̆ng hmă ‘nao, hăm trong jang pơm lăp sơ đơ̆ng, tơ tĕnh păng vei lăng đei yua jĭ hơ buh. Phŏ Thủ tướng hơ dai hăm ‘noh tơ tă mă blŭng truh tơ drong ƀet vắc-xin bơ̆ng jĭ Covid-19 ăn hơ ioh đơ̆ng 5 truh 11 sơ năm. Kŭm hăm ‘noh, chu ăn hơ ioh năm hŏk đĭ ‘noh bơ ngai jĭ tŏk; gĭt kăl ‘noh vei lăng đei tơ drong tơ poh lanh, đei trong jang hơ met ‘lơ̆ng bơ ngai jĭ F0, F1 mă lăp.

Thuem: Tơ blơ̆