VOV4.Bahnar - Pơ gê ‘năr 18/8, tơ̆ xăh hơ tăih hơ tŏ Ea Sol, apŭng Ea H’leo (Dak Lak), pơ gơ̆r “ Năr đĭ đăng kon pơ lei vei lăng sơ đơ̆ng teh đak sơ năm 2022”. Năm akŏm păng iung pơ ma tơ̆ jơ pơm lêh, ƀok Nguyễn Trọng Nghĩa - Bí thư Trung ương Đảng, Kơ dră anih tơ roi tơ băt Trung ương chih iŏk păng pôk pơ ư dôm tơ drong jơ nei mă Đảng bộ, Khŭl kơ dră păng kon pơ lei xăh Ea Sol pơ ma hơ drô̆ kŭm nhen dêh char Dak Lak pơ ma atŭm hlôi iŏk đei lơ̆m khei ‘năr âu ki.

Ƀok Nguyễn Trọng Nghĩa asong tơ mam ăn ŭnh hnam teh đak tơ gŭm tơ̆ xăh  Ea Sol

Hơ dai hăm, athei kơ dră đảng, kơ dră rim tơ ring kơ dêh char Dak Lak hơ nơ̆ng jang kiơ̆ ‘lơ̆ng hloh dơ̆ng, đei iŏk yua dôm hla ar athei đơ̆ng Đảng păng teh đak păng pơ tho đơ̆ng Anih tơm vei lăng Kŏng an lơ̆m tơ drong jang “ Đĭ đăng kon pơ lei vei lăng sơ đơ̆ng teh đak”. Tơ drong nai, bơ̆n athei hơ nơ̆ng hơ met ming păng hơ tŏk hơ năp jang đơ̆ng kră pơ lei, bơ ngai đei đe lui yom lơ̆m kon pơ lei kon kông, păng kon pơ lei kiơ̆ lui, dôm bơ ngai jang tơm kơ rim khŭl jang chĭnh trĭ păng đĭ đăng kon pơ lei hơ drin vang jang tơ drong jang đĭ đăng kon pơ lei vei lăng sơ đơ̆ng teh đak.

Thuem: Tơ blơ̆