VOV4.Bahnar - Drơ̆m kơ sơ̆ ‘năr (1/7), ƀok Nguyễn Chí Dũng, Bơ ngai jang lơ̆m Anih chĕp kơ̆l pơ gơ̆r Trung ương Đảng, Kơ dră Anih tơm tơ lĕch nơ̆r sơ kơ̆t păng tơ mơ̆t jên jang, păng ƀok Nguyễn Hồng Diên, bơ ngai jang lơ̆m Anih chĕp kơ̆l pơ gơ̆r Trung ương Đảng, Kơ dră Anih tơm vei lăng găh kơ măy kơ mŏk mơ dro sa kŭm hăm khŭl bơ̆ jang kơ Trung ương hlôi đei ‘măng năm ngôi păng bơ̆ jang tơ̆ dêh char Dak Nông găh tơ drong bơ̆ jang kiơ̆ tơ drong tơ chơ̆t păng pơ tôch đơ̆ng Anih tơm Chĭnh trĭ găh hơ tŏk tơ iung mŭk drăm - tơ pôl, vei sơ đơ̆ng khŭl linh, sơ đơ̆ng tơ ring Tây Nguyên.

Pơ tôch jơ bơ̆ jang, Kơ dră Anih tơm tơ lĕch nơ̆r sơ kơ̆t păng tơ mơ̆t jên jang Nguyễn Chí Dũng pơ ma, Dak Nông hlôi iŏk đei lơ jơ nei gĭt kăl pơ têng hăm tơ drong hơ găt tơ lĕch ăn đơ̆ng tơ drong tơ chơ̆t; tơ drong jang chĭnh trĭ, tơ drong sơ đơ̆ng đei vei kơ jăp; tơ drong arih sa jơ hngơ̆m đon, tơ mam drăm kơ kon pơ lei, mă loi ‘noh jĭ tơ ring kon pơ lei kon kông roi ‘năr roi đei hơ tŏk ‘lơ̆ng. Kơ dră tơm Nguyễn Chí Dũng pơ ma hơ dăh, Dak Nông kăl athei tŭn hrĕnh tơ drong proh hơ met dêh char, jang kiơ̆ lơ̆m tơ drong vă jang hơ tŏk tơ iung đơ̆ng Trung ương păng rim anih tơm, anih jang hlôi tơ băt hơ dăh vă vei sơ đơ̆ng tơ drong kơ jăp păng hơ tŏk tơ iung ƀlep trong jăh hơ nhăk Dak Nông hơ tŏk tơ iung hrĕnh, kơ jăp ‘lơ̆ng.

Thuem: Tơ blơ̆