VOV4.Bahnar - ‘Năr 20/1, Khul jang đơ̆ng Trung ương yoa yă Bùi Thị Minh Hoài, Bí thư Trung ương Đảng, Kơ dră chĕp kơ̆l Anih krao hơ vơn kon pơ lei kơ Trung ương chĕp kơ̆l, năm hơ pong, hmach thơ thou têt, hơ păh tơ mam ăn dôm unh hnam đei kŏng, bơ ngai tơ nuh, công nhân bơ ngai jang mơ mat tat ƀât têt Nguyên đán Nhâm Dần 2022 tơ̆ dêh char Đắk Nông.

Kơ dră Anih krao hơ vơn kon pơ lei Trung ương Bùi Thị Minh Hoài hơ păh tơ mam ăn unh hnam tơ nuh, công nhân, bơ ngai jang mơ mat tat

Khul hơ păh 350 tơ pu tơ mam đơ̆ng Anih Trung ương MTTQ Việt Nam tơ gŭm ăn dôm unh hnam đei kŏng, unh hnam mơ mat tat, tơ nuh hin; 200 tơ pu tơ mam đơ̆ng Tổng Liên đoàn Lao động Việt Nam ăn 200 ‘nu công nhân, bơ ngai jang mơ mat tat ƀơm ưh ‘lơ̆ng đơ̆ng jĭ Covid-19.

Kơ dră Anih vei lăng hơ drĕch kon kông kơ Kuôk hô̆i Y Thanh Hà Niê Kdăm hơ păh 500 triu hlak jên đơ̆ng Anih mong jên BIDV tơ gŭm ăn dôm bơ ngai mơ mat tat tơ̆ Dak Nông

Lơ̆m ‘măng năm hơ pong âu mơ̆n, ƀok Y Thanh Hà Niê Kdăm, Kơ dră Anih vei lăng hơ drĕch kon kông kơ Kuô̆k hô̆i hơ păh 150 tơ pu tơ mam ăn unh hnam tơ nuh, unh hnam đei kŏng, bơ ngai đei kon pơ lei lui yom, unh tơ nuh, mơ mat tat dêh hlŏh păng 500 triu hlak jên đơ̆ng Anih mong jên tơ mât jang păng atŏk tơ iung Việt Nam tơ gŭm ăn dôm unh hnam đei kŏng, bơ ngai tơ nuh, bơ ngai jang mơ mat tat tơ̆ dêh char.

Dơ̆ng: Tơ blơ̆