VOV4.Bahnar - Tơ băt 75 sơ năm Năr Lĭnh jĭ rơ ka - Lĭnh lôch dŏng teh đak, pơ gê ‘năr 26/7, khŭl tang măt Anih chĕp kơ̆l pơ gơ̆r Trung ương Đảng, Kuôk hô̆i, teh đak, Khŭl kơ dră teh đak, Anih jang Trung ương Mặt trận Tổ quốc Việt Nam hlôi dan gơ vang pơ kao, soh nhang ƀlŏk hơ dơ̆r kơ đe lĭnh nuih mơng lôch dŏng teh đak tơ̆ Hơ nih man ƀlŏk hơ dơ̆r kơ đe lĭnh nuih mơng lôch dŏng teh đak ( trong Bắc Sơn, Hà Nội) păng dan gơ vang pơ kao, mơ̆t hơ pong tơ̆ pơ sat Kơ dră Hồ Chí Minh.

Kơ dră chĕp kơ̆l đảng, teh đak hơ pong kơ ƀok Kơ dră Hồ Chí Minh

Lơ̆m tơ drong kŭp yom tơ păt, dôm bơ ngai tang măt hlôi kŭp kơ̆l ƀlŏk hơ dơ̆r kơ dôm bơ ngai kon hơ gei kơ hơ drĕch hơ drŭng hlôi hŭt hơ kâu, pham lĕch sĕch huŏng yua kơ tơ drong jang iŏk rơ ngei hơ drĕch hơ drŭng, rơ ngei teh đak, yua kơ chủ nghĩa xã hội păng tơ drong jang apŭng plrĕnh teh gĭt kăl. Gơ vang pơ kao đơ̆ng khŭl chih chư “ Ling lang ƀlŏk bơ nê kơ đe lĭnh nuih mơng lôch dŏng teh đak.”

Hơ nih man ƀlŏk hơ dơ̆r kơ đe lĭnh nuih mơng lôch dŏng teh đak hrei ‘nâu đei klơ̆p ƀĕnh pơ kao ƀlŏk hơ dơ̆r đơ̆ng dôm khŭl mơ̆t hơ pong

Hơ dai lơ̆m năr âu mơ̆n, dôm khŭl tang măt Quân ủy Trung ương, Anih tơm vei lăng khŭl linh; Anih jang Đảng Kŏng an Trung ương, Anih tơm vei lăng Kŏng an; Anih tơm vei lăng găh bơ ngai jang, lĭnh jĭ rơ ka păng tơ pôl; pơ lei tơm Hà Nội... rim anih jang khŭl grŭp tơ pôl lơ̆m teh đak păng apŭng plĕnh teh hlôi năm dan gơ vang pơ kao, ƀlŏk hơ dơ̆r kơ đe lĭnh nuih mơng lôch dŏng teh đak tơ̆ Hơ nih man tơ băt kơ đe lĭnh nuih mơng lôch dŏng teh đak păng mơ̆t hơ pong tơ̆ pơ sat Kơ dră Hồ Chí Minh.

Thuem: Tơ blơ̆