VOV4.Bahnar - Lơ̆m dôm năr blŭng sơ năm ‘nao, kơ dră chĕp kơ̆l anih jang đảng dêh char, Dơ nŏ anih vei lăng kon pơ lei păng Jơ nŭm pơ gơ̆r kon pơ lei dêh char Dak Lak năm ngôi, tơ ƀâp đe kăn ƀô̆, bơ ngai jang tơ̆ 1,2 công ty, anih jang lơ̆m dêh char vă pơ lung dôm anih jang yak hlŏh mơ mat tat, hơ tŏk tơ drong jang xa.

Bí thư đảng dêh char Dak Lak Nguyễn Đình Trung hơ păh jên ƀât blŭng sơ năm ăn công nhân tơ̆ Công ty pơm ƀier Sài Gòn- Tơ ring Tŏk bŏk

Mă hơ dăh, dôm khul jang đơ̆ng Anih jang đảng dêh char, Dơ nŏ anih vei lăng kon pơ lei dêh char Dak Lak năm ngôi păng tơ ƀâp muh măt ƀât blŭng sơ năm hăm đe kăn ƀô̆, công nhân tơ̆ Công ty jang hơ doi găh đak xăng, đak dâu Pơ băh Tây Nguyên, Công ty jang chĕh phe Thắng Lợi, Công ty jang hơ doi pơm mam pơ sei Đông Nam Á păng 1,2 anih jang lơ̆m dêh char.

Tơ̆ Công ty pơm ƀier Sài Gòn – tơ ring Tŏk bŏk, ƀok Nguyễn Đình Trung, Bí thư đảng dêh char Dak Lak kŭm hăm khul jang mơ̆ng nơ̆r tơ roi găh tơ drong jang đơ̆ng Công ty, năm lăng tơ̆ anih jang păng tơ ƀâp, pơ ma nuh hăm đe công nhân. Bí thư đảng Dak Lak tơ chĕng ‘lơ̆ng dôm tơ drong adrin đơ̆ng Công ty mưh hlôi yak hlŏh dôm tơ drong mơ mat tat yoa đơ̆ng jĭ vă pơm ‘lơ̆ng ăn tơ drong jang xa, ưh đei bơ ngai yơ jĭ covid-19.

Dơ̆ng: Tơ blơ̆