VOV4.Bahnar - Lơ̆m 2 năr 19 păng 20/1, Khul jang đơ̆ng Anih jang đảng dêh char, Jơ nŭm pơ gơ̆r kon pơ lei, Dơ nŏ anih vei lăng kon pơ lei dêh char, Anih MTTQ Việt Nam dêh char Kon Tum năm ngôi, hmach thơ thou têt ăn khul linh vei lăng tơ ring sơ lam, khul kơ dră păng kon pơ lei tơ̆ tơ ring sơ lam tơ ter hăm tĕh đak Lào.

Bí thư đảng dêh char Kon Tum Dương Văn Trang hmach thơ thou Têt, hơ păh tơ mam ăn kăn ƀô̆, linh vei lăng tơ ring sơ lam

Truh ngôi, hmach thơ thou têt ăn kăn ƀô̆, linh tơ̆ dôm kơ đông, khul kơ dră pơ gơ̆r păng kon pơ lei tơ̆ 3 xăh sơ lam tơ til hăm tĕh đak Lào, đei: Đăk Plô, Đăk Nhoong, apŭng Đăk Glei; Đăk Dục, apŭng Ngọc Hồi, Bí thư đảng dêh char, Kơ dră Jơ nŭm pơ gơ̆r kon pơ lei dêh char Kon Tum Dương Văn Trang kŭm hăm dôm bơ ngai jang lơ̆m khul jet gia pơ ma nuh găh tơ drong hơ met têt, hơ păh tơ mam ăn kăn ƀô̆, linh vei lăng tơ ring sơ lam, khul kơ dră tơ ring păng kon pơ lei.

Bí thư đảng dêh char Kon Tum Dương Văn Trang (bơ ngai yơ̆l môk) năm ngôi, hmach thơ thou têt, hơ păh tơmam ăn unh hnam tơ nuh tơ̆ plei Bung Tôn, xăh Đăk Plô, apŭng Đăk Glei.

Khul oei truh hơ pong, hmach thơ thou têt, hơ păh tơ mam ăn 1,2 unh hnam đei kŏng hăm kăch mang tơ̆ xăh Đăk Plô, Đăk Nhoong, apŭng Đăk Glei păng xăh Đăk Dục, apŭng Ngọc Hồi. Ƀlep ƀât ‘măng mă âu 1,2 anih tĕch mơ dro năm hơ dai hăm Khul hơ păh 600 tơ pu tơ mam, 1 tơ pu đei kơ jă 500 rơ bâu hlak jên ăn kon pơ lei 3 xăh sơ lam.

Dơ̆ng: Tơ blơ̆