VOV4.Bahnar - Lơ̆m sơ năm 2021, mă đơ̆ng pŭ ƀơm ưh kơ ‘lơ̆ng đơ̆ng jĭ covid 19, Anih radio nơ̆r pơ ma Việt Nam hlôi sơ kơ̆t hơ dăh anih dơ̆ng ‘noh jĭ anih jang tơ roi tơ băt tơm, jang đang ‘lơ̆ng hơ năp jang đei pơ jao, tơ gop tih ăn tơ drong jang kơ tơ̆ng ang păng tơ roi tơ băt. ‘Noh jĭ nơ̆r pơ ma hơ dăh đơ̆ng kơ dră Anih tơm vei lăng găh tơ drong kơ tơ̆ng ang păng tơ roi tơ băt, Phŏ kơ dră Anih tơ roi tơ băt Trung ương Nguyễn Mạnh Hùng tơ̆ jơ pơ tôch tơ drong jang sơ năm 2021 păng tơ lĕch jang hơ năp jang sơ năm 2022 đơ̆ng Anih radio nơ̆r pơ ma Việt Nam. Lơ̆m sơ năm âu ki, Anih radio nơ̆r pơ ma Việt Nam hlôi lang lang jang kiơ̆ trong vă jang, pơ gơ̆r đơ̆ng Khŭl kơ dră teh đak, Anih jang tơ roi tơ băt Trung ương, Anih tơm vei lăng găh tơ drong kơ tơ̆ng ang păng tơ roi tơ băt, akŏm tơ roi tơ băt lơ tơ drong, tơ drong kăl tih kơ teh đak lơ̆m lơ loăi um rup, lơ tơ drong, lơ nơ̆r pơ ma. Mă loi ‘noh, lơ̆m khei ‘năr jĭ covid 19 đei ƀôh kơ tang lơ̆m sơ năm 2021, Anih radio nơ̆r pơ ma Việt Nam hlôi pơ gơ̆r lơ ‘măng tơ roi tơ băt jrŭ să găh tang găn jĭ.

Kơ dră Anih tơm vei lăng găh tơ roi tơ băt păng kơ tơ̆ng ang Nguyễn Mạnh Hùng pơ ma tơ̆ hop akŏm

Sơ năm 2022, Bơ ngai jang lơ̆m Trung ương Đảng, Kơ dră dơ nơm vei lăng Anih radio nơ̆r pơ ma Việt Nam pơ ma hơ dăh: Anih radio nơ̆r pơ ma Việt Nam gô akŏm kơ tang ăn tơ drong hơ met ming păng akŏm tơ plih kơ sô̆ vă jang kiơ̆ ‘lơ̆ng hơ năp jang chĭnh trĭ đei Đảng păng teh đak pơ jao ăn.

Sơ năm 2022, Anih radio nơ̆r pơ ma Việt Nam gô pơ gơ̆r pơ long pơ re nơ̆r lơ̆m teh đak ‘măng mă XV tơ̆ pơ lei tơm Hồ Chí Minh păng Tơ drong jang Chính luận - Joh ayŏ kơ dŏ soang tơ băt 92 sơ năm năr pơ jing Đảng Cộng sản Việt Nam.

Thuem: Tơ blơ̆