VOV4.Bahnar - Lơ̆m jơ năr năm tơ mang păng bơ̆ jang tơ̆ Lào đơ̆ng Khŭl kơ dră chĕp kơ̆l Anih sek tơ lang kon pơ lei gĭt kăl Việt Nam đơ̆ng ‘năr 09 – 13/8, ‘năr 12/08,  Chánh án Anih sek tơ lang kon pơ lei Nguyễn Hòa Bình kŭm hăm khŭl năm kơ kuh pơ ma dơ nuh hăm Tổng bí thư, Kơ dră teh đak Lào Thongloun Sisoulith păng Kơ dră Kuôk hô̆i Lào Saysomphone Phomvihane. Tơ̆ jơ sơng, Chánh án Anih sek tơ lang kon pơ lei gĭt kăl Nguyễn Hòa Bình hlôi tơ roi tơ băt hăm Tổng Bí thư, Kơ dră teh đak Thongloun Sisoulith pơ tôch ‘măng pơ ma đam đơ̆ng Anih sek tơ lang kon pơ lei gĭt kăl Lào păng Anih sek tơ lang kon pơ lei gĭt kăl Việt Nam; pơ tôch pơ gơ̆r hop akŏm Anih sek tơ lang dôm dêh char sơ lam 3 teh đak Lào - Việt Nam - Campuchia ‘măng mă 6 păng tơ roi tơ băt atŭm hơ dăh tơ drong jang đơ̆ng dôm pang lơ̆m tơ drong hơ tŏk loi dơ̆ng jang hơ dai kơ jăp lơ̆m tơ drong jang anih sek tơ lang 3 teh đak. Tổng Bí thư, Kơ dră teh đak Lào Thongloun Sisoulith tơ ƀôh đon chhôk hơ iă sơng khŭl năm tơ mang păng bơ̆ jang tơ̆ Lào ‘măng ‘nâu; hơ dai hăm pơ ma hơ dăh, anih sek tơ lang Lào păng Việt Nam kăl kơ jang hơ dai kơ jăp hloh dơ̆ng vă tơ tom hơ met pơ ‘lơ̆ng dôm tơ drong ‘nao ƀôh, hơ nhăk ăn tơ drong đei yua ‘lơ̆ng ăn kon pơ lei kŭm nhen tơ drong lui ngeh đơ̆ng kon pơ lei hăm khŭl kơ dră, kŭm nhen pơ jing đon lui đơ̆ng kon pơ lei hăm Đảng, teh đak.

Thuem: Tơ blơ̆