VOV4.Bahnar - Hơ nơ̆ng ‘măng năm bơ̆ jang tơ̆ dôm dêh char pơ băh tŏk bŏk, kơ sơ̆ 26/7, Kơ dră Kuôk hô̆i Vương Đình Huệ păng khŭl bơ̆ jang hlôi bơ̆ jang hăm Khŭl kơ dră chĕp kơ̆l Anih jang Đảng dêh char Quảng Ngãi. Kiơ̆ tơ roi tơ băt đơ̆ng kơ dră chĕp kơ̆l dêh char Quảng Ngãi, tơ drong tŏk GRDP sơ năm 2021 iŏk đei 6,05%; 6 khei blŭng sơ năm jô̆ pơ hlom iŏk đei 6,34%.

Kơ dră Kuôk hô̆i Vương Đình Huệ bơ̆ jang hăm Khŭl kơ dră chĕp kơ̆l anih jang Đảng dêh char Quảng Ngãi

Tơ drong jang kơ măy kơ mŏk hơ nơ̆ng jing tơ drong tưk tơ iung tơm ăn mŭk drăm tŏk kơ dêh char; tơ mang lăng, pơ vih pơ văn đei lơ tơ plih ‘lơ̆ng; thu mong jên jang hơ nơ̆ng kơ tŏk, yak hloh 51,1% tơ drong hơ găt Trung ương pơ jao; 06 khei blŭng sơ năm jô̆ pơ hlom đei vă jê̆ 17.000 ti hlak jên.

Kơ dră Kuôk hô̆i Vương Đình Huệ bơ̆ jang hăm Khŭl kơ dră chĕp kơ̆l anih jang Đảng dêh char Quảng Ngãi

Drơ̆ng lăp hăm trong jang, hơ năp jang đơ̆ng dêh char tơ̆ hơ năp kơnh, Kơ dră Kuôk hô̆i Vương Đình Huệ athei, dêh char Quảng Ngãi hơ nơ̆ng tơ plih ‘nao, hơ gei, hơ drin jang kiơ̆ jơ nei dôm tơ drong jang chĭnh trĭ kơ dêh char; akŏm tơ lĕch jang 1,2 tơ drong jang tih, tơ gĕch iŏk tơ drong đei yua kơ tơ ring hơ tŏk tơ iung đơ̆ng rŏng; vei tơ drong hơ pơi ‘meh vă yak hloh jing dêh char pơ drŏng kiơ̆ ‘meh vă đơ̆ng nhap ƀok Thủ tướng Phạm Văn Đồng, vă Quảng Ngãi jing 1 lơ̆m dôm anih kơ drơ̆m hơ tŏk tơ iung kơ tơ ring Tŏk bŏk.

Thuem: Tơ blơ̆