VOV4.Bahnar - Kơ sơ̆ ‘năr 20/3, tơ̆ pơ lei tơm Hồ Chí Minh, Kơ dră Kuôk hô̆i Vương Đình Huệ hlôi bơ̆ jang hăm Khŭl chĕp kơ̆l pơ gơ̆r Anih jang Đảng pơ lei tơm Hồ Chí Minh găh pơ tôch tơ drong jang chĕp kơ̆l, pơ gơ̆r vei lăng păng pơ tôch jang kiơ̆ trong tơ lĕch jang hơ tŏk tơ iung mŭk drăm - tơ pôl pơ lei tơm Hồ Chí Minh sơ năm 2021, hơ năp jang tơm sơ năm 2022; Pơ tôch tơ lĕch jang Tơ drong tơ chơ̆t kơ sô̆ 54 đơ̆ng Kuôk hô̆i găh pơ long trong jang tơ gŭm hơ drô̆ hơ tŏk tơ iung pơ lei tơm Hồ Chí Minh.

Găh trong jang, hơ năp jang tơ̆ hơ năp kơnh, Kơ dră Kuôk hô̆i Vương Đình Huệ tơ tă truh khŭl kơ dră chĕp kơ̆l pơ lei tơm Hồ Chí Minh kăl kơ hơ tŏk loi dơ̆ng pơ jing, hơ met  ming Đảng păng tơ drong jang chĭnh trĭ rơ goh, pran kơ jăp; pơ jing lơ̆m tơ doă 1 jơ hngơ̆m đon, drơ̆ng 1 nơ̆r. Akŏm tơ drong jang pơ jing trong jang, jang kiơ̆ kơ jăp tơ drong tơ chơ̆t hop akŏm XIII kơ Đảng păng tơ chơ̆t hop akŏm Đảng bộ pơ lei tơm ‘măng mă XI, dăr hơ len dôm tơ drong bơ̆ jang, jăh đei dôm tơ drong jang hơ tŏk tơ iung mŭk drăm - tơ pôl, rim tơ drong tơm, hơ găt, hơ năp jang vă hơ met ming tơ mơ̆t dơ̆ng vei sơ đơ̆ng mă lăp, ‘lơ̆ng.

Thuem: Tơ blơ̆