VOV4.Bahnar - Hơ nơ̆ng ‘măng năm bơ̆ jang tơ̆ dôm dêh char găh pơ băh păng tơ măn đak krong Cửu Long, pơ gê ‘năr 25/1, Kơ dră Kuôk hô̆i Vương Đình Huệ kŭm hăm khŭl bơ̆ jang hlôi năm ngôi, hmach têt ăn kang ƀô̆, khŭl linh kŏng an păng khŭl jang pơ gang bơ̆ jang tang găn jĭ hơ buh lơ̆m dêh char  Cà Mau. Kơ dră Kuôk hô̆i Vương Đình Huệ pơ ma hơ dăh, Cà Mau đei anih jang gĭt kăl găh mŭk drăm, vei lăng sơ đơ̆ng, tơ ring teh sĭt kơ teh đak. Yua kơ tơ ring bơ̆ jang, kơ na khŭl linh kŏng an dêh char Cà Mau kăl hơ drin kơ tang hloh dơ̆ng. Vă ƀlŏk hơ dơ̆r kơ dôm khŭl jang tơ̆ anih jang tang găn jĭ hơ buh Covid-19, tang măt ăn kơ dră Đảng, teh đak, Kơ dră Kuôk hô̆i Vương Đình Huệ hlôi asong tơ mam păng hmach kơ đe kang ƀô̆, khŭl linh lơ̆m khŭl linh kŏng an kon pơ lei păng đe y ƀak si kơ dêh char Cà Mau kŭm hăm ŭnh hnam đei 1 năr têt ‘nao, kiơ̆ ƀlep trong jang kăl “ Têt oei sa hơ dai - Pơ yan puih mak sơ đơ̆ng hiôk”.

Thuem: Tơ blơ̆