VOV4.Bahnar - Kơ sơ̆ ‘năr 25/1, tơ̆ pơ lei tơm Hồ Chí Minh, Kơ dră Kuôk hô̆i Vương Đình Huệ păng khŭl bơ̆ jang hlôi năm ngôi, hmach têt bơ ngai đei kŏng, ŭnh hnam teh đak tơ gŭm, khŭl jang tơ̆ hơ nih tang găn jĭ Covid-19; năm ngôi, hmach Têt păng pơ jao tơ mam Têt truh tơ pôl bơ ngai jang kơ teh đak, bơ ngai bơ̆ jang păng dôm hơ ioh tŏk bŏk rong ‘me, vei lăng păng hơ met jĭ tơ̆ Hơ nih hơ met pơ ‘lơ̆ng tơ drong jĭ păng tơ gŭm hơ ioh jo jăn.

Kơ dră Kuôk hô̆i tơ ƀôh đon chơt hơ iă ƀơ̆t lăng ƀôh pơ lei tơm chĕp hơ năn ƀok Hồ hlôi sơ đơ̆ng ‘lơ̆ng hmă dơ̆ng, pơ vei dôm tơ drong jang găh chĭnh trĭ, mŭk drăm, tơ pôl. Truh dang ei, kơ sô̆ bơ ngai F0 ăl, lôch yua đơ̆ng jĭ Covid rim năr hlôi tơ jur lơ păng mă đơ̆ng tŏk bŏk athei pŭ hiong răm kơ tang, mă lei hăm tơ drong joăt joe pran kơ tang, tơ drong băt ‘mêm ưh kơ gơh lê̆ bu đei hŭt lê̆ tơ̆ rŏng, pơ lei tơm oei vei lăng ‘lơ̆ng tơ drong jang vei sơ đơ̆ng tơ drong arih sa, vă rim bơ ngai, rim hnam đei sa Têt ngăl.

Thuem: Tơ blơ̆