VOV4.Bahnar - Lơ̆m jơ năr năm tơ mang tơ̆ Lào, kơ sơ̆ ‘năr 17/5, Kơ dră Kuôk hô̆i Vương Đình Huệ păng Khŭl tang măt gĭt kăl kơ Kuôk hô̆i teh đak bơ̆n hlôi năm tơ mang tơ̆ Hnam trưng teh đak rong hŏk tro kon kông oei sa kơ tă dêh char Champasak. Hnam trưng teh đak rong hŏk tro kon kông oei sa kơ tă kơ dêh char Champasak jĭ 1 lơ̆m dôm hnam trưng ‘noh jĭ tơ mam asong ăn đơ̆ng Khŭl kơ dră  teh đak păng kon pơ lei Việt Nam ăn Khŭl kơ dră teh đak păng kon pơ lei Lào. Hnam trưng teh đak rong hŏk tro kon kông oei sa kơ tă kơ dêh char Champasak pơ jing đơ̆ng sơ năm 1999, klĕp truh dang ei, hnam trưng hlôi tơ gop pơ tho pơ hrăm tôch kơ lơ kon oh dôm hơ drĕch kon kông Lào kơ 4 dêh char găh pơ băh Lào. Hnam trưng hlôi iŏk đei lơ jơ nei ‘lơ̆ng lơ̆m pơ tho păng hŏk. Mă loi ‘noh lăng kăl truh tơ drong hŏk nơ̆r Việt. Hnam trưng teh đak rong hŏk tro kon kông oei sa kơ tă dêh char Champasak dang ei đei hloh 900 ‘nu hŏk tro, găh 14 hơ drĕch hơ drŭng. Kơ dră Kuôk hô̆i Vương Đình Huệ tơ băt, 2 Đảng, 2 teh đak ‘măn tơ gŭm hơ drol akŏm lơ kon jên ăn tơ drong jang pơ tho pơ hrăm vă hơ tŏk tơ iung bơ ngai jang, vă pơm lăp hăm ‘meh vă đơ̆ng jăl jang ‘nao. Găh athei đơ̆ng hnam trưng hơ tŏk jên hŏk ƀŏng, hơ nơ̆ng tơ gŭm, pơm hơ met ming tơ mam pơ tho păng hŏk ăn hnam trưng. Kơ dră Kuôk hô̆i Vương Đình Huệ chih iŏk păng pơ jao ăn Anih jang tang măt kơ Việt Nam tơ̆ Lào kŭm hăm dôm anih jang lơ̆m Anih jang hơ dai 2 teh đak tơ chĕng hơ len păng set hơ len vă dar deh hơ met pơ ‘lơ̆ng. Ƀlep ƀơ̆t ‘măng âu, Kơ dră kuôk hô̆i Vương Đình Huệ hlôi pơ jao asong ăn kơ đe hŏk tro hŏk hơ gei nơ̆r Việt kơ hnam; asong ăn hnam trưng tơ mam ‘noh đei hla ar, tơ mam hnam trưng hŏk đei kơ jă 320 triệu hlak jên.

Thuem: Tơ blơ̆