Kơ dră Kuô̆k hô̆i Vương Đình Huệ pơ ma ƀât blŭng hop akŏm

Pơ gê 20/10, tơ̆ Hnam Kuô̆k hô̆i pơm lêh pơih blŭng ăn Hop akŏm mă 4, Kuô̆k hô̆i jăl 15 hăm tơ drong pơ gơ̆r đơ̆ng Kơ dră Kuô̆k hô̆i Vương Đình Huệ. Tơ chĕng adrol lơ̆m 21 năr bơ̆ jang, Kuô̆k hô̆i vă hơ len năng, tơ gop nơ̆r păng tơ chơ̆t lơ tơ drong gĭt kăl ƀơm truh mŭk drăm, tơ pôl păng jên thu mong, tơ lĕch jeng kơ tĕh đak; set hơ len, pơ drơ̆ng nơ̆r ăn 07 kơ luơ̆t, 03 tơ drong tơ chơ̆t đei nơ̆r hơ găt đơ̆ng luơ̆t; pơ ma nuh, tơ gop nơ̆r ăn 07 kơ luơ̆t nai.

Dôm bơ ngai tang măt Kuô̆k hô̆i vang truh Hop akŏm ‘măng mă 4

Pơ ma ƀât jơ pơih blŭng, Kơ dră Kuô̆k hô̆i Vương Đình Huệ pơ ma hơ dăh, hăm tơ drong chĕp kơ̆l pơ gơ̆r tôch trŏ, gơ̆h hơ gei, tôch tơ tom đơ̆ng Đảng păng tĕh đak; đei trong jang lăp ‘lơ̆ng, tôch kơ chăng păng tơ dỏng dăr lăng tôch đei yoa đơ̆ng Kuô̆k hô̆i; tơ drong chĕp kơ̆l pơ gơ̆r tôch hơ len, pran kơ tang đơ̆ng Khul kơ dră tĕh đak, Thủ tướng tĕh đak; tơ drong mât mĭng jơ hngâm, jang hơ doi kơ jăo đơ̆ng rim anih jang. Rim tơ drong lơ̆m tĕh đak 9 khei sơ năm 2022 jang đei lơ tơ drong jơ nei ‘lơ̆ng, đei lơ tơ drong tôch hơ iă. Tơ drong jang tŏk GDP 9 khei đei 8,83% lơ hlŏh jô̆ đơ̆ng sơ năm 2011 truh dang ei; dôm tơ ring, anih jang mŭk drăm jang tơ iung ming păng jang tŏk pran ngăl.