VOV4.Bahnar - Kơ sơ̆ ‘năr 22/8, tơ̆ Hnam Kuôk hô̆i, Kơ dră Kuôk hô̆i Vương Đình Huệ hlôi truh akŏm ‘măng bơ̆ jang đơ̆ng Khŭl dăr hơ len kơ Kuôk hô̆i hăm Anih vei lăng kon pơ lei pơ lei tơm Hà Nội găh jang kiơ̆ ‘mơ ‘met, tang găn brăh brư. Roi tơ băt đơ̆ng Anih vei lăng kon pơ lei pơ lei tơm Hà Nội, tơ drong jang kiơ̆ ‘mơ ‘met, tang găn brăh brư ling lang đei bơ ngơ̆t truh, chĕp kơ̆l, pơ gơ̆r ‘lơ̆ng păng băt hơ dăh ‘noh jĭ hơ năp jang gĭt kăl kơ pơ lei tơm. Kăl kơ lăng truh lơ̆m jăl jang 2016-2021, pơ lei tơm hlôi ‘mơ ‘met đei vă jê̆ 42.000 ti hlak jên.

Jơ bơ̆ jang đơ̆ng Kơ dră Kuôk hô̆i hăm Anih vei lăng kon pơ lei pơ lei tơm Hà Nội

Iung pơ ma tơ̆ jơ bơ̆ jang, Kơ dră Kuôk hô̆i Vương Đình Huệ hơ len lăng, Pơ lei tơm Hà Nội jĭ tơ ring ling lang đei jơ hngơ̆m đon jang tơ năp ‘lơ̆ng găh ‘mơ ‘met, tang găn  brăh brư lơ̆m pơ đĭ hloi tơ drong jang teh đak păng kơ dih. Tơ̆ hơ năp kơnh, pơ lei tơm Hà Nội kăl kơ dăr hơ len ưh kơ lê̆ brăh brư teh nhen teh choh jang sa tam mă iŏk yua, tơ drong tơ gar iŏk yua glăi teh choh jang sa; jang hrôih tơ drong jang chĕng hơ met teh, jô̆ hơ len vă đei teh rơ kăh ăn hơ tŏk tơ iung, iŏk jang tôch ai teh.

Thuem: Tơ blơ̆