VOV4.Bahnar - Pơ gê 10/3, Anih chĕp kơ̆l pơ gơ̆r Kuô̆k hô̆i tơ gop nơ̆r ăn tơ drong jang Chih tơ lĕch trong hơ găt, trong pơm hla ar set hơ len, tơ chơ̆t ăn bơ ngai et ma túy đơ̆ng 12 sơ năm truh hơ la kơ 18 sơ năm mât hơ met tơ̆ Anih pơ gŏ hơ met et dư.

Kơ dră Kuô̆k hô̆i Vương Đình Huệ pơ ma lơ̆m hop akŏm

Pơ ma ƀât blŭng hop akŏm, Kơ dră Kuô̆k hô̆i Vương Đình Huệ ăn tơ băt: Anih chĕp kơ̆l pơ gơ̆r Kuô̆k hô̆i hlôi bơ̆ jang kiơ̆ trong tơ lĕch păng apinh nơ̆r tơ gop ăn 6 grŭp tơ drong. Lăng kiơ̆ kơ phĭu drơ̆ng nơ̆r hlôi tơ chơ̆t 2 grŭp tơ drong vă apinh jet Kơ dră tơm vei lăng jang kơ măy, tĕch mơ dro Nguyễn Hồng Diên păng Kơ dră tơm vei lăng tơ mam drăm cham char Trần Hồng Hà. 

Tơ̆ jơ hop akŏm til pơ gê, Anih chĕp kơ̆l pơ gơ̆r Kuô̆k hô̆i drơ̆ng nơ̆r hăm trong chih tơ lĕch tơ drong tơ chơ̆t, trong pơm hla ar set hơ len, tơ chơ̆t ăn bơ ngai et ma túy đơ̆ng 12 sơ năm truh hơ la kơ 18 sơ năm mât hơ met tơ̆ anih pơ gŏ hơ met et dư. Mă lei, kiơ̆ dôm bơ ngai tang măt, bơ ngai đei chih lơ̆m Hla ar tơ chơ̆t ‘nŏh jĭ bơ ngai et ma túy đơ̆ng 12 sơ năm truh hơ la kơ 18 sơ năm păng tơ drong ăn đe sư mât tơ̆ anih pơ gŏ hơ met ‘nŏh ưh kơ sĭ trong sek tơ lang phak, kơ na athei chih hơ dăh tơ drong ‘nâu, pơm hla ar ‘lơ̆ng, băt ‘mêm mơ nat, vei lăng tơ drong đei yoa ‘lơ̆ng hlŏh ăn bơ ngai athei.

Dơ̆ng: Tơ blơ̆