VOV4.Bahnar - Kơ sơ̆ ‘năr 29/7, Kơ dră Kuôk hô̆i Vương Đình Huệ hlôi sơng bơ ngai jang tơ gŭm gĭt kăl kơ Khŭl Nghị sĩ jang tơ bôl Nhật-Việt Takebe Tsutomu. Kơ dră kuôk hô̆i Vương Đình Huệ lăng ‘lơ̆ng hơ năp jang đơ̆ng bơ ngai jang tơ gŭm gĭt kăl kơ Khŭl jang tơ bôl Việt Nam-Nhật Bản Takebe Tsutomu lơ̆m tơ drong hơ tŏk loi dơ̆ng tơ drong pơ vei jang hơ dai đơ̆ng 2 teh đak pơ ma atŭm păng đơ̆ng 2 anih jang pơ jing khôi luơ̆t 2 teh đak pơ ma hơ drô̆.

Jơ hop akŏm

Kơ dră Kuôk hô̆i Vương Đình Huệ lăng ‘lơ̆ng đơ̆ng tơ drong jang Hnam trưng Đại học Việt-Nhật găh Đại học Quốc gia Hà Nội; tơ ƀôh đon hơ mĕng Hnam trưng Đại học Việt-Nhật gô nhen ŭnh pơ chrang hơ dăh, tơ ƀôh ăn tơ drong pơ vei jang hơ dai đơ̆ng 2 teh đak. Kơ dră Kuôk hô̆i hôn bơ nê tơ drong Anih tơm Tư pháp Nhật Bản hơ met ming Tơ drong tơ chơ̆t sơng iŏk bơ ngai jang, tơ gŭm ăn hŏk tơ drong jang kơ Việt Nam tơ̆ Nhật Bản; ‘meh 2 teh đak hơ nơ̆ng jang hơ dai vă hơ tŏk đei yua đơ̆ng trong jang hơ dai âu; hơ dai hăm tơ chĕng hơ len pơ trŭt jang hơ dai iŏk bơ nga jang tơ̆ hơ năp kơnh.

Thuem: Tơ blơ̆