VOV4.Bahnar - Drơ̆m kơ sơ̆ ‘năr 23/8 tơ̆ Hnam Kuôk hô̆i, Kơ dră Kuôk hô̆i Vương Đình Huệ hlôi sơng Khŭl tang măt đe hơ druh tơ dăm, Đảng Kon pơ lei pơm tơm hiôk hian Nhật Bản năm tơ mang, bơ̆ jang tơ̆ Việt Nam. Kơ dră Kuôk hô̆i Vương Đình Huệ hmach chơt hơ iă kơ Đảng kon pơ lei pơm tơm hiôk hian Nhật Bản iŏk jơ nei lơ̆m ‘măng pôk rơih Thượng viện khei 7 âu ki. Lăng ‘lơ̆ng hơ năp jang đơ̆ng hơ druh tơ dăm, dôm nghị sĩ mơ lôh lơ̆m hơ tŏk tơ iung tơ drong pơ vei Việt Nam - Nhật Bản, Kơ dră Kuôk hô̆i pơ ma hơ dăh, Kuôk hô̆i  Việt Nam tơ gŭm tơ drong hơ tŏk loi dơ̆ng tơ drong pơ vei đơ̆ng jơ hnơr mơ lôh 2 teh đak păng dôm nghị sĩ mơ lôh 2 teh đak. Kơ dră Kuôk hô̆i athei dôm nghị sĩ mơ lôh khŭl hơ druh tơ dăm Đảng LDP Nhật Bản hơ nơ̆ng bơ ngơ̆t truh tơ pôl bơ ngai Việt Nam tơ̆ Nhật Bản, bơ ngơ̆t hloh dơ̆ng truh dôm trong jang hơ dai găh bơ ngai jang đơ̆ng 2 teh đak, pơm tơ drong hiôk vă bơ ngai jang Việt Nam năm bơ̆ jang tơ̆ Nhật Bản. Kŭm hăm ‘noh, hơ druh tơ dăm 2 teh đak gô pơ gơ̆r dôm Festival hơ druh tơ dăm, sinh viên hơ nơ̆ng, mă loi ‘noh lơ̆m sơ năm 2023 ƀơ̆t 2 teh đak tơ băt 50 sơ năm pơ jing tơ drong pơ vei jang tơ bôl; nghị sỹ mơ lôh 2 teh đak kăl kơ hơ tŏk loi dơ̆ng dôm ‘măng năm ngôi, vang tơ roi tơ drong hlôh vao bơ̆ jang, tơ roi băl găh dôm tơ drong vang bơ ngơ̆t truh.

Thuem: Tơ blơ̆