VOV4.Bahnar - Drâm kơ sơ̆ 6/9, tơ̆ Hnam Kuô̆k hô̆i, Kơ dră Kuô̆k hô̆i Vương Đình Huệ sơng Kơ dră jang lơ̆m Khul kơ dră chĕp kơ̆l Trung ương Đảng Kon pơ lei kăch mang Campuchia (CPP), Kơ dră chĕp kơ̆l Anih tơm Phnôm Pênh ƀok Khuông Sơ-reng, chĕp kơ̆l khul tang măt ăn Anih tơm Phnôm Pênh năm hơ pong păng bơ̆ jang tơ̆ Anih tơm Hà Nội. 

Kơ dră Kuô̆k hô̆i Vương Đình Huệ pơ ma hơ dăh, trong jang ưh đei tơ plih đơ̆ng Đảng, tĕh đak Việt Nam ‘nŏh ling lang năng kăl tơ drong pơ vei “Tĕh đak jê̆ băl ‘lơ̆ng hơ iă, boăl juăt đơ̆ng sơ̆, jang hơ doi tôm tơ drong, kơ jăp ‘lơ̆ng” hăm Campuchia lơ̆m rim tơ drong jang kơ Đảng, Khul kơ dră tĕh đak, Kuô̆k hô̆i.

Ƀât mă sơ năm 2022 đei lơ tơ drong gĭt kăl ‘nŏh jĭ Sơ năm jang tơ bôl Việt Nam - Campuchia, tơ băt 55 sơ năm năr pơ jing tơ drong pơ vei jang tơ bôl kơ 2 tĕh đak, Kơ dră Kuô̆k hô̆i athei 2 anih tơm hơ nơ̆ng pơ ma nuh, drơ̆ng 1 nơ̆r păng tưk hơ tŏk dôm tơ drong jang tơ bôl, jang hơ doi, roi tơ băt ăn băl dôm tơ drong kăl găh lơ tơ drong nhen mŭk drăm, tơ mât jên jang, chă tơ mang lăng; hơ pơi ‘mĕh, Kơ dră chĕp kơ̆l Anih tơm Phnôm Pênh tơ rĕk, pơ jing tơ drong ‘lơ̆ng ăn dôm anih tĕch mơ dro, bơ ngai Việt Nam oei arih xa, bơ̆ jang tơ̆ tĕh đak Camphuchia.

Dơ̆ng: Tơ blơ̆