VOV4.Bahnar - Drâm kơ sơ̆ 22/3, tơ̆ Hnam Kuô̆k hô̆i, Kơ dră Kuô̆k hô̆i Vương Đình Huệ sơng yă Manuela Ferro, Phŏ Kơ dră Anih mong jên apŭng plenh tĕh (WB) vei lăng tơ ring Đông Á-Thái Bình Dương ƀlep ƀât yă năm bơ̆ jang tơ̆ Việt Nam đơ̆ng ‘năr 17 – 24/3/2022.

Kơ dră Kuô̆k hô̆i Vương Đình Huệ akhan, hrei ‘nâu Việt Nam oei mong akŏm jên ăn tơ drong jang tŏk. Kuô̆k hô̆i Việt Nam hơ pơi ‘mĕh WB tơ gŭm ăn Việt Nam hơ nơ̆ng hơ met ming jên jang kơ tĕh đak păng jên hre kiơ̆ trong jang kơ jăp đunh, mong akŏm jên tŏk iŏk hăm jên kon tŏ sĕt păng pơ jing tơ drong hiôk hian ăn tơ drong jang tŏk. ‘Nâu jĭ trong jang tơm vă jang hơ drol đơ̆ng Việt Nam.

Yă Manuela Ferro tơ chĕng ‘lơ̆ng tơ drong pơ chĕh păng bơ̆ jang tôch kơ chăng đơ̆ng Kuô̆k hô̆i Việt Nam mưh pơ gơ̆r hop akŏm mŭk drăm rim sơ năm vă tơ lĕch dôm trong jang, tơ drong tơ gŭm, khôi luơ̆t vă tưk tơ iung tơ drong jang tŏk tĕh đak păng pơ ma hơ dăh, WB vă athei dôm bơ ngai juăt jang vang jang lơ̆m tơ drong ‘nâu; WB tơ gŭm ăn tơ drong jang dăr lăng đơ̆ng Kuô̆k hô̆i, mă loi ‘nŏh dăr lăng jên jang kơ tĕh đak.

Dơ̆ng: Tơ blơ̆