VOV4.Bahnar - Ƀlep ƀơ̆t tơ băt năr Apŭng plĕnh teh kơ đe drŏ kăn 8-3 păng kơ kuh Hop akŏm bơ ngai tang măt drŏ kăn lơ̆m teh đak ‘măng XIII, jăl jang 2022 - 2027, pơ gê ‘năr 8/3, tơ̆ Hnam Kuôk hô̆i, Kơ dră Kuôk hô̆i Vương Đình Huệ hlôi tơ ƀơ̆p muh măt Khŭl đă ƀŏng lŏng drŏ kăn Việt Nam - đe “Drŏ kăn linh Hơ nglŏng dreng” -  đe “ Hơ druh măih” kơ đă ƀŏng lŏng Việt Nam. Pơ ma tơ̆ tơ ƀơ̆p muh măt, Kơ dră Kuôk hô̆i Vương Đình Huệ pơ ma hơ dăh, athei lăng tơ drong gơh hơ gei đă ƀŏng lŏng tơ plŏng kơ dâu hơ tŏ băl hăm dôm tơ drong gơh hơ gei nai, nhen toán, joh ayŏ, kơ dŏ soang, nơ̆r pơ ma... vă jăh chă ƀôh tơ drong hơ gei, đei trong pơ tho ‘lơ̆ng, ưh kơ lê̆ lon, brăh brư tơ drong hơ gei lơ̆m tơ drong đă ƀŏng lŏng tơ plŏng kơ dâu.

Vă jang kiơ̆ ‘lơ̆ng dôm tơ drong hơ găt mă anih jang vei lăng găh đă ƀŏng lŏng tơ plŏng kơ dâu hlôi tơ lĕch ăn păng lăng truh, lơ̆m noh đei đă ƀŏng lŏng pơ ma atŭm păng đă ƀŏng lŏng drŏ kăn pơ ma hơ drô̆, Kơ dră Kuôk hô̆i Vương Đình Huệ athei, kăl kơ băt kơ jăp, hơ tŏk ‘lơ̆ng đon hlôh vao dôm đon tơ chĕng đơ̆ng Đảng, teh đak găh hơ tŏk hơ năp jang đơ̆ng drŏ kăn lơ̆m tơ drong jang pơ jing păng vei lăng teh đak, găh hơ tŏk tơ iung pơ tâp hơ kâu jăn teh đak bơ̆n pơ ma atŭm păng hơ tŏk tơ iung đă ƀŏng drŏ kăn pơ ma hơ drô̆.

Thuem: Tơ blơ̆