VOV4.Bahnar - Kơ sơ̆ ‘năr 6/5, tơ̆ Hà Nội, Anih tơm vei lăng Kŏng an pơ gơ̆r Hop akŏm pơ tôch 01 sơ năm bơ̆ jang kiơ̆ Tơ chơ̆t kơ sô̆ 01 đơ̆ng Anih tơm Chĭnh trĭ, pơ tôch ‘măng krao hơ vơn “ Pơ jing jơ hngơ̆m đon Kŏng an kon pơ lei nŭih mơng, ƀĕnh jơ hngơ̆m đon ‘lơ̆ng, yua kơ kon pơ lei pơ vih pơ văn”, Hơ găt iŏk nơ̆r tơ gop Kon pơ lei păng pơ jao asong dôm trong pôk hơ păh kơ teh đak. Kơ dră Kuôk hô̆i Vương Đình Huệ vang hop akŏm. Pơ ma tơ̆ hop akŏm, tang măt Kơ dră chĕp kơ̆l Đảng, teh đak, Anih chĕp kơ̆l pơ gơ̆r Kuôk hô̆i, Kơ dră Kuôk hô̆i Vương Đình Huệ pôk pơ ư păng hmach chơt hơ iă kơ dôm jơ nei đơ̆ng khŭl linh Kŏng an kon pơ lei hlôi iŏk đei.

Tơ̆ hơ năp kơnh, kơ dră Kuôk hô̆i Vương Đình Huệ athei Đảng bộ Kŏng an Trung ương, Anih tơm vei lăng Kŏng an hơ nơ̆ng tŭn pran tơ drong hŏk pơ hrăm păng pơm kiơ̆ jơ hngơ̆m đon ‘lơ̆ng Hồ Chí Minh kiơ̆ Tơ chơ̆t kơ sô̆ 01, Tơ chơ̆t kơ sô̆ 05 đơ̆ng Anih tơm Chĭnh trĭ tơ klep hăm bơ̆ jang kiơ̆ 6 tơ drong ƀok Hồ pơ tho Kŏng an kon pơ lei, ‘măng krao hơ vơn “ Pơ jing jơ hngơ̆m đon Kŏng an kon pơ lei nŭih mơng, ƀĕnh jơ hngơ̆m đon ‘lơ̆ng, yua kơ kon pơ lei pơ vih pơ văn”, mă loi ‘noh lăng kăl tơ drong jang pơ tho chĭnh trĭ đon tơ chĕng, pơ tho pơ hrăm joăt joe, pơ tho jơ hngơ̆m đon ‘lơ̆ng, jơ hngơ̆m đon jang tơ năp, băt bơ̆ jang ăn teh đak, pơ vih pơ văn ăn kon pơ lei lơ̆m đĭ đăng khŭl linh.

Thuem: Tơ blơ̆