VOV4.Bahnar - Hơ met ăn tơ drong jang dăr hơ len găh tơ drong jang kiơ̆ trong jang tơ gŭm khôi luơ̆t găh pơm kiơ̆ ‘mơ ‘met, tang găn brăh brư jăl jang 2016-2021, pơ gê ‘năr 23/8, tơ̆ Hnam Kuôk hô̆i, Kơ dră Kuôk hô̆i Vương Đình Huệ vang truh akŏm ‘măng bơ̆ jang đơ̆ng khŭl dăr hơ len kơ Kuôk hô̆i hăm Anih tơm vei lăng jên hu. Iung pơ ma tơ̆ jơ bơ̆ jang, Kơ dră Kuôk hô̆i athei Anih tơm vei lăng jên hu kăl athei hlôh vao ƀlep ‘mơ ‘met găh jên hu ưh kơ hơ drô̆ nhen xăng kep vă kăt ƀơk pơ hoach mă ƀlep nhen tơ drong đơ̆ng Luơ̆t tơ lĕch ăn ‘mơ ‘met, tang găn brăh brư. Kiơ̆ tơ roi tơ băt đơ̆ng Kơ dră Anih tơm vei lăng jên hu Hồ Đức Phớc, đơ̆ng sơ năm 2016 truh sơ năm 2021, dôm anih jang kơ Anih tơm vei lăng jên hu hlôi ‘mơ ‘met đei hloh 6.000 ti hlak jên lơ̆m tơ drong jang pơm, hơ len lăng, kĭ ăn jô̆ hơ drol, tơ lĕch, vei lăng, iŏk yua jên jang teh đak. Jô̆ truh sơ năm 2021 Anih tơm vei lăng jên hu hlôi tơ jur biên chế đei 106% trong tơ lĕch jang, tơ jur 36 anih jang jur oei pă 28 anih jang. Kơ dră Kuôk hô̆i Vương Đình Huệ pơ ma hơ dăh, jang kiơ̆ ‘mơ ‘met, tang găn brăh brư ưh kơ sĭ rim sơ năm ‘mơ ‘met dôm yơ jên, mă gĭt kăl ‘noh jĭ dăr hơ len, hơ met pơ ‘lơ̆ng dôm tơ drong tơ hlăk tơ hlĭn, mơ mat tat, pơm pơ cheh trong jang tơ gŭm hơ tŏk tơ iung vă pơm đei kơ jă roi tŏk.

Thuem: Tơ blơ̆