VOV4.Bahnar - Ƀlep ƀât năr Hla ar tơ roi kăch mang Việt Nam 21/6, Kơ dră Kuô̆k hô̆i Vương Đình Huệ truh hơ pong, bơ̆ jang hăm Ƀăo Bơ ngai tang măt Kon pơ lei. Pơ ma tơ̆ âu, Kơ dră Kuô̆k hô̆i Vương Đình Huệ akhan, hla ar tơ roi hlôi roi tơ ƀôh tôch trŏ “tơ drong arih xa” tơ̆ hop akŏm Kuô̆k hô̆i păng jing kênh vă bơ ngai tăh hla, Kon pơ lei dăr lăng tơ drong jang đơ̆ng Kuô̆k hô̆i pơ ma adrô̆, dôm anih jang kơ tĕh đak pơ ma atŭm.

Kơ dră Kuô̆k hô̆i Vương Đình Huệ pơ ma hơ dăh, lơ̆m khei ‘năr jang hăm kơ măy kơ mŏk sô̆, Khul kơ dră chĕp kơ̆l Ƀăo Bơ ngai tang măt Kon pơ lei hơ nơ̆ng tơ lĕch trong jang tôch rơ gei, khŏm tơ plih ‘nao tơ drong chih tơ roi păng trong roi tơ băt, tơ tăm, chă lơ trong jang lăp ‘lơ̆ng, hơ bĕch hơ bal hăm dôm tơ drong ‘mĕh vă ‘nao đơ̆ng anih jang mŭk drăm sô̆, tơ pôl kơ sô̆ mă tĕh đak bơ̆n oei druh kiơ̆. Vă hơ tŏk hlŏh dơ̆ng tơ drong đei yoa mưh roi tơ băt tơ drong jang đơ̆ng Kuô̆k hô̆i, Kơ dră Kuô̆k hô̆i athei Ƀăo Bơ ngai tang măt kon pơ lei bơ̆ jang ‘lơ̆ng tơ drong tơ lĕch trong jang tŏk, vei lăng mă lăp, drơ̆ng 1 nơ̆r lơ̆m rim tơ drong jang, athei trŏ hăm trong jang, tơ drong pơ gơ̆r đơ̆ng Đảng, khôi luơ̆t tĕh đak.

Dơ̆ng: Tơ blơ̆