VOV4.Bahnar - Bơ̆ jang tơ drong jang đơ̆ng Đảng khul Kuô̆k hô̆i sơ năm 2022, kơ sơ̆ 29/3, tơ̆ Hnam Kuô̆k hô̆i, Bí thư Đảng khul Kuô̆k hô̆i, Kơ dră Kuô̆k hô̆i Vương Đình Huệ pơ gơ̆r jơ bơ̆ jang đơ̆ng Đảng khul Kuô̆k hô̆i hăm Khul kơ dră chĕp kơ̆l đảng dêh char Khánh Hoà. Tơ̆ jơ bơ̆ jang, Đảng khul Kuô̆k hô̆i mơ̆ng Khul kơ dră chĕp kơ̆l đảng dêh char Khánh Hoà tơ roi găh tơ drong jang kiơ̆ Tơ drong tơ chơ̆t kơ sô̆ 09 ‘năr 28/1 đơ̆ng Anih tơm Chinh trĭ găh pơ jing, atŏk tơ iung dêh char Khánh Hòa truh sơ năm 2030, trong jang truh sơ năm 2045 păng tơ drong jang kiơ̆ dôm Tơ drong tơ chơ̆t đơ̆ng Kuô̆k hô̆i găh mŭk drăm, tơ pôl tơ̆ dêh char Khánh Hoà.

Tơ drong tơ chơ̆t đơ̆ng Anih tơm Chinh trĭ tơ lĕch 10 tơ drong jang, trong jang tơm vă pơ jing dêh char Khánh Hòa truh sơ năm 2030 jing plt găh Trung ương kiơ̆ đơ̆ng tưk tơ iung tơ drong pran ‘lơ̆ng găh đak dơ sĭ, jĭ tơ ring kơ drâm rơ gei, kơ jăp ‘lơ̆ng păng tơ guăt hăm apŭng plenh tĕh; jĭ 1 tơ ring jang tŏk pran, anih tŏk bŏk kơ tơ ring tơ ter đak dơ sĭ păng găh Pơ băh tơ ring Tŏn bŏk, Tây Nguyên păng jơ̆p lơ̆m tĕh đak găh jang mŭk drăm đak dơ sĭ. Tơ̆ jơ bơ̆ jang, dôm bơ ngai tang măt vang iung pơ ma, tơ gop lơ trong jang vă atŏk tơ iung dêh char Khánh Hòa, mă loi jĭ pơ jing dôm tơ drong tơ gŭm gĭt kăl vă bơ̆ jang đei dôm tơ drong jang, trong jang tơ iung pơ jing, jang tŏk kơ dêh char Khánh Hòa truh sơ năm 2030, trong vă jang truh sơ năm 2045.

Dơ̆ng: Tơ blơ̆