VOV4.Bahnar - Tơ̆ Hnam Kuô̆k hô̆i Anh, Kơ dră Kuô̆k hô̆i Vương Đình Huệ hlôi pơ ma đam hăm Kơ dră Thượng viện Anh John Mcfall. Tơ̆ jơ pơ ma đam, 2 ‘nu kơ dră chĕp kơ̆l chơt hơ iă mưh ƀôh, Việt Nam păng Anh hlôi jang hơ doi tôch kơ jăp lơ̆m trong jang lơ pang nhen tơ̆ Liên hợp quốc, Grŭp jang hơ doi Á - Âu (ASEM) păng lơ̆m trong jang hơ doi ASEAN-Anh, Việt Nam ling lang tơ gŭm ăn Anh hơ tŏk tơ drong jang hơ doi hăm ASEAN păng Anh tơ gŭm ăn tơ drong jang tơm đơ̆ng ASEAN păng pơm gơng tơ ƀơh tôch gĭt kăl đơ̆ng Việt Nam păng EU.

Kơ dră Kuô̆k hô̆i Vương Đình Huệ pơ ma đam hăm Kơ dră Thượng viện Anh

Ƀar păh drơ̆ng nơ̆r hơ nơ̆ng hơ tŏk tơ drong pơ gơ̆r pơ ma nuh ăn Khul kơ dră chĕp kơ̆l, dôm anih jang kơ Kuô̆k hô̆i, Grŭp ngĭ si jang tơ bôl păng rim ngĭ si; pơ ma nuh găh tơ drong juăt jang đơ̆ng nghị viện rim tĕh đak; hơ tŏk tơ drong dăr lăng, pơ gơ̆r bơ̆ jang dôm tơ drong drơ̆ng nơ̆r jang hơ doi mă Khul kơ dră 2 tĕh đak hlôi kĭ pơ kăp, dôm tơ drong jang hơ doi gĭt kăl đunh sơ năm; tơ gŭm ăn Khul kơ dră tĕh đak, khul kơ dră tơ ring, anih tĕch mơ dro păng kon pơ lei 2 tĕh đak hơ tŏk tơ drong jang hơ doi, tơ ƀâp pơ ma nuh vă roi hlôh vao băl păng jang hơ doi 2 păh đei yoa ngăl.

Dơ̆ng: Tơ blơ̆