VOV4.Bahnar - Lơ̆m ‘măng năm hơ pong tơ̆ tĕh đak Cộng hoà Dân chủ Nhân dân Lào, pơ gê 17/5 tơ̆ Anih tơm Viêng-chăn, Kơ dră Kuô̆k hô̆i Vương Đình Huệ pơ ma nuh hăm Thủ tướng tĕh đak Lào Phankham Viphavanh. Tơ̆ jơ tơ ƀâp, 2 ‘nu kơ dră chĕp kơ̆l lăp đon găh tơ drong jang tŏk ‘lơ̆ng lơ̆m tơ drong pơ vei jang hơ doi đơ̆ng 2 tĕh đak khei ‘năr âu ki, tơ chĕng ‘lơ̆ng tơ drong 2 păh adrin vei kơ jăp tơ drong pơ ma nuh, ăn khul jang tih tơ ƀâp băl.

Kơ dră Kuô̆k hô̆i Vương Đình Huệ tơ ƀâp Thủ tướng Lào

Kơ dră Kuô̆k hô̆i Vương Đình Huệ pơ ma hơ dăh, Kuô̆k hô̆i Việt Nam tôch năng kăl tơ drong pơ jing păng hơ met pơ ‘lơ̆ng trong chĕp kơ̆l pơ gơ̆r, khôi luơ̆t vă pơm lăp hăm tơ drong jang tơ plih ‘nao păng mât jang hơ doi hăm apŭng plenh tĕh, hơ nơ̆ng tơ gŭm păng dăr lăng, tưk tơ iung dôm tơ drong jang hơ doi đơ̆ng Khul kơ dră 2 tĕh đak Việt Nam păng Lào.

Găh trong pơm hơ tŏk tơ drong jang hơ doi 2 pang tơ̆ hơ năp kơnh, 2 ‘nu kơ dră chĕp kơ̆l pơ ma truh tơ drong athei tơ lĕch jang hơ doi mă kơ jăp, mă ‘lơ̆ng dôm tơ drong drơ̆ng nơ̆r đơ̆ng kơ dră kơ pal. 2 păh drơ̆ng nơ̆r athei hơ nơ̆ng adrin chă trong jang pran ‘lơ̆ng hlŏh vă tưk tơ iung tơ drong jang hơ doi mŭk drăm jing 1 tơ drong jang tơm hlŏh lơ̆m tơ drong pơ vei kơ 2 tĕh đak, tơ găl hăm tơ drong pơ vei ‘lơ̆ng hơ iă, kăp gĭt Việt-Lào.

Dơ̆ng: Tơ blơ̆