VOV4.Bahnar - Drâm kơ sơ̆ 14/6, Kơ dră Kuô̆k hô̆i Vương Đình Huệ sơng bơ ngai tang măt ăn New Zealand – yă Tredene Cherie Dobson. Kơ dră Kuô̆k hô̆i tơ ƀôh đon hơ iă tơ̆ hơ năp dôm hơ yak tŏk ‘lơ̆ng lơ̆m tơ drong pơ vei jang hơ doi gĭt kăl Việt Nam - New Zealand khei ‘năr âu ki. Ƀlep ƀât ‘măng mă âu, Kơ dră Kuô̆k hô̆i Vương Đình Huệ bơ nê Khul kơ dră tĕh đak New Zealand ƀât kơ plăh mơ mat tat hlŏh hlôi tơ gŭm ăn Việt Nam tôch ‘lơ̆ng vă tang găn jĭ Covid-19 păng jô̆ hloi lơ̆m khei ‘năr bơ̆ jang tơ iung ming, jang tŏk dơ̆ng mŭk drăm.

Kơ dră Kuô̆k hô̆i Vương Đình Huệ sơng Bơ ngai tang măt ăn New Zealand

Kuô̆k hô̆i Việt Nam bơ nê Khul kơ dră tĕh đak, kon pơ lei New Zealand ling lang tơ rĕk truh păng ‘măn tơ drong tơ gŭm kăp gĭt hăm kơ sô̆ jên ODA vă Việt Nam bơ̆ jang dôm tơ drong jang atŏk tơ iung pran kơ jăp, akŏm găh dôm tơ drong mă New Zealand jang pran păng Việt Nam ‘mĕh vă nhen choh jang xa, atŏk tơ iung tơ ring tơ rang, pơ tho pơ hrăm, atŏk tơ iung khul bơ ngai jang, vei lăng păng tơ jră hăm tơ drong sar bar, tŏ ‘mi kial tơ plĭh păng bơ̆ jang tơ jur tơ nuh hin.

Dơ̆ng: Tơ blơ̆