VOV4.Bahnar - Drâm kơ sơ̆ 12/3, tơ̆ Hnam Kuô̆k hô̆i, Kơ dră Kuô̆k hô̆i Vương Đình Huệ sơng Kơ dră chep kơ̆l Grŭp jang Erax Honna Hitoshi. Kơ dră Kuô̆k hô̆i Vương Đình Huệ pơ ma hơ dăh, tơ drong pơ vei jang hơ doi gĭt kăl yoa tơ drong rơ ngei păng hơ nŭk hơ noa tơ̆ châu Á đơ̆ng Việt Nam păng Nhật Bản khei ‘năr âu ki tŏk tôch ‘lơ̆ng, tôch đei yoa lơ̆m rim tơ drong.

Kiơ̆ Kơ dră Kuô̆k hô̆i Vương Đình Huệ, trong jang tŏk unh điên rơ gŏh păng tơ plih ming dôm tơ drong jang man hnam kơ măy unh điên kơ dâu hăm ngar jing hnam kơ măy unh điên rơ gŏh đơ̆ng Grŭp jang Erax tôch lăp hăm trong jang kơ tĕh đak găh jang tŏk rơ gŏh ‘lơ̆ng đơ̆ng 2021-2030, trong jang truh sơ năm 2050 đơ̆ng Việt Nam mă Khul kơ dră tĕh đak ‘nao drơ̆ng nơ̆r.

Kơ dră Kuô̆k hô̆i Vương Đình Huệ pơ ma hơ dăh, Kuô̆k hô̆i, Khul kơ dră tĕh đak Việt Nam tơ gŭm ăn trong jang ‘nao; atŭm hăm ‘nŏh roi tơ băt, hrei ‘nâu, khôi luơ̆t Việt Nam đei lơ tơ drong hơ găt chih tôch rơ đăh găh rim tơ drong jang vă pơ jing tơ drong ‘lơ̆ng ăn anih jang đơ̆ng tĕh đak đe truh tơ mât jên jang xa tơ̆ Việt Nam.

‘Nao âu, Grŭp jang Erax hlôi dăr lăng tơ̆ 16 dêh char, plt. Kiơ̆ đơ̆ng chă dăr lăng, Grŭp jang pơ jing 19 tơ drong jang hăm 1400 MW truh sơ năm 2035; kŭm hăm ‘nŏh pơih xă trong jang atŏk tơ iung hơ drĕch ‘long ‘nao, hnam kơ măy đei kơ sư̆k pơm tơ lĕch unh điên tih ƀiơ̆.

Dơ̆ng: Tơ blơ̆