VOV4.Bahnar - Kơ sơ̆ 19/7, tơ̆ Hnam Kuô̆k hô̆i, Kơ dră Kuô̆k hô̆i Vương Đình Huệ sơng Kơ dră chĕp kơ̆l pơ gơ̆r Anih mong jên apŭng plenh tĕh (WB) Axel van Trotsenburg, ƀlep ƀât năm hơ pong tơ̆ Việt Nam đơ̆ng ‘năr 17 - 19/7.

Kơ dră Kuô̆k hô̆i Vương Đình Huệ pơ ma hơ dăh, WB ling lang jing anih jang hơ doi tôch gĭt kăl păng tôch sơ đơ̆ng hlôi tơ gŭm tôch ‘lơ̆ng vă Việt Nam bơ̆ jang đei dôm tơ drong hơ găt jang tŏk pran kơ jăp. Tơ̆ COP26, Việt Nam hlôi tơ lĕch nơ̆r pơ kăp tôch rơ đăh truh sơ năm 2050 găn pơ đĭ kơ chơ̆t ‘mê̆ ‘mach đei tơ lĕch hŭt tơ̆ ‘ngoăih. ‘Nâu jĭ nơ̆r pơ kăp hơ tŏ hăm dôm tĕh đak châu Âu, tơ ƀôh hơ dăh đon pơ hnŏng tôch ai păng hơ năp jang tôch tơ năp đơ̆ng Việt Nam hăm tơ pôl apŭng plenh tĕh.

Jơ ƀok Kơ dră Kuô̆k hô̆i Vương Đình Huệ sơng Kơ dră chĕp kơ̆l pơ gơ̆r Anih mong jên apŭng plenh tĕh

Kơ dră chĕp kơ̆l pơ gơ̆r WB ăn tơ băt, WB hlôi hơ tŏk dơ̆ng 50% kơ sô̆ jên pơ kăp jang hơ doi hăm dôm tĕh đak đơ̆ng rŏng kơ jĭ hơ buh Covid-19 truh 200 ti USD. Tơ drong tơ gŭm âu vă dôm tĕh đak gơ̆h tơ jră hrĕnh hăm tơ drong rơ hyŭng rơ hyăng, atŭm hăm ‘nŏh đei trong jang đunh đai, năm truh tơ drong tơm jang atŏk tơ iung pran kơ jăp.

Dơ̆ng: Tơ blơ̆